जळगाव (प्रतिनिधी) माजी मंत्री एकनाथराव खडसे यांनी भाजप सोडून राष्ट्रवादी काँग्रेस पक्षात प्रवेश केल्यानंतर, विरोधी पक्षनेते देवेंद्र फडणवीस हे प्रथमच खडसेंच्या मतदारसंघात आहेत. महत्त्वाचं म्हणजे देवेंद्र फडणवीस यांनी आज मुक्ताईनगर येथील खडसेंच्या घरी जाऊन भाजप खासदार रक्षाताई खडसे यांची भेट घेतल्यामुळे राजकीय चर्चांना उधाण आलं आहे.
देवेंद्र फडणवीस यांनी कालच राष्ट्रवादी काँग्रेसचे अध्यक्ष शरद पवार यांची मुंबईतील सिल्वर ओक या त्यांच्या निवासस्थानी भेट घेतली होती. त्यानंतर फडणवीस आज थेट जळगावात रक्षाताई खडसेंच्या भेटीसाठी पोहोचले आहेत. एकनाथराव खडसे यांनी भाजपला रामराम करुन राष्ट्रवादी काँग्रेसमध्ये प्रवेश केल्यानंतर फडणवीस आज पहिल्यांदात जळगावच्या मुक्ताईनगरमध्ये आले आहेत. फडणवीसांनी यावेळी मुक्ताईनगरमधील ग्रामीण रुग्णालयाची पाहणी केली. याशिवाय वादळ आणि पावसामुळे झालेल्या नुकसानीचीही ते पाहणी करणार आहेत. दौऱ्याची सुरुवात करण्यापूर्वी फडणवीस यांनी मुक्ताईनगर तालुक्यातील कोथळी येथे खडसेंच्या घरी सदिच्छा भेट दिली. या ठिकाणी त्यांनी एकनाथ खडसेंच्या सून तथा भाजप खासदार रक्षाताई खडसे यांच्यासह इतर भाजप पदाधिकाऱ्यांशी चर्चा केली.
जळगाव जिल्ह्यातील भाजपची पडझड बघता पक्षबांधणी संदर्भात ही रक्षाताई खडसेंसोबत चर्चा होण्याची शक्यता आहे. गेल्या आठवड्यात मुक्ताईनगर पंचायतीमधील भाजपच्या आजी माजी दहा नगरसेवकांनी सोडचिठ्ठी देत शिवसेनेत प्रवेश केला होता. त्याबाबत फडणवीस रक्षाताई खडसे यांच्याशी चर्चा झाल्याचे कळते.
