नाशिक (वृत्तसंस्था) नाशिकमध्ये अखिल भारतीय मराठी साहित्य संमेलनात कोरोनाचा शिरकाव झाला आहे. भुजबळ नॉलेज सिटीच्या प्रांगणात सुरू असलेल्या ९४व्या अखिल भारतीय मराठी साहित्य संमेलनाच्या समारोपाच्या दिवशी पुण्याहून आलेले दोन प्रकाशक करोना बाधित सापडल्यामुळे खळबळ उडाली आहे. आता त्यांच्या संपर्कात आलेल्या व्यक्तींच्या शोधासाठी पालिकेची धावपळ सुरू आहे.
भुजबळ नॉलेज सिटीच्या प्रांगणात तीन दिवासांपासून सुरू असलेल्या अखिल भारतीय साहित्य संमेलनाची आज सांगता होणार आहे. परंतु, अखेरच्या दिवशीच पुणे येथून आलेल्या दोन प्रकाशकांची कोरोना चाचणी पॉझिटीव्ह आली. दोघांची चाचणी पॉझिटिव्ह आल्यानंतर एकच खळबळ उडाली. आता पॉझिटिव्ह प्रकाशकांच्या संपर्कात आणखी किती जण आले आहेत हे शोधण्याचे आव्हान प्रशासनासमोर आहे. कोरोनाचा प्रादुर्भाव टाळण्यासाठी साहित्य संमेलनाच्या प्रवेशद्वारावर रॅपिड चाचणी करूनच आत प्रवेश दिला जात आहे. आज सकाळीही अशीच नियमित तपासणी सुरू असताना दोघांचे अहवाल पॉझिटिव्ह आले. अहवाल पॉझिटिव्ह येताच संमेलन समितीने सुरक्षेच्या दृष्टीने पाऊले उचलली आहेत.
