धरणगाव (प्रतिनिधी) नळाचे पाणी आल्याने पाणी भरण्यासाठी मोटार लावत असताना विजेचा जोरदार धक्का लागून विवाहितेचा दुर्दैवी मृत्यू झाला. ही घटना शनिवार दि. १० फेब्रुवारी रोजी रात्री ८ वाजेच्या सुमारास घडली. विजया राहुल पाटील (वय २४, रा. दोनगाव खुर्द ता. धरणगाव), असे मयत विवाहितेचे नाव आहे.
धरणगाव तालुक्यातील दोनगाव खुर्द येथे विजया राहूल पाटील या विवाहिता पती व दोन मुलांसह वास्तव्याला होत्या. विजया पाटील यांचे पती राहुल हे सेंट्रिंग काम करून कुटुंबाचा उदरनिर्वाह करतात. शनिवार दि. १० फेब्रुवारी रोजी रात्री आठ वाजेच्या सुमारास नळाचे पाणी आले होते. त्यावेळेला पाण्याची मोटार लावण्यासाठी गेलेली विवाहिता विजया पाटील यांना विजेचा धक्का लागून त्यांचा जागीच मृत्यू झाला. कुटुंबीयांनी व गावकऱ्यांनी सदर विवाहितेला उपचारासाठी शासकीय वैद्यकीय महाविद्यालय व रुग्णालय, जळगाव येथे आणले असता तेथे वैद्यकीय अधिकाऱ्यांनी त्यांना तपासून मयत घोषित केले आहे. यानंतर कुटुंबीयांनी मनहेलावणारा आक्रोश केला. याप्रकरणी पोलीसात अकस्मात मृत्यूची नोंद करण्यात आली आहे.
