मुंबई (वृत्तसंस्था) नवी मुंबईत एका ८० वर्षीय वृद्धानं कथितरित्या १० हजार रुपयांच्या बदल्यात एका तरुणाच्या पत्नीशी लैंगिक संबंध ठेवण्याची मागणी केली होती. यानंतर या वृद्धाची हत्या करण्यात आली. एका ३३ वर्षीय व्यक्तीवर या हत्येचा आरोप ठेवण्यात आला आहे. दरम्यान, सीसीटीव्ही कॅमेऱ्यामुळं पोलिसांना आरोपीपर्यंत पोहोचणं शक्य झालं.
शमाकांत तुकाराम नाईक असं मृत व्यक्तीचं नाव आहे. मृत व्यक्तीच्या नावावर दुकाने, फ्लॅट आणि प्लॉटसह कोट्यवधी रुपयांची मालमत्ता आहे. मृत वृद्ध नाईक ३३ वर्षीय आरोपीच्या दुकानात अनेक वेळा जात असे. तसंच एकदा त्यानं ५ हजार रुपयांच्या मोबदल्यात तरुणाकडे त्याच्या पत्नीसोबत शारीरिक संबंध ठेवण्याची मागणी केली होती, असं वृत्त आहे.
पोलिसांनी माहिती दिली की, अशाच प्रकारे २९ ऑगस्टला वृद्ध नाईकनं युवकाला १० हजार रुपये देऊ करत त्याच्या पत्नीला गोडाऊनमध्ये पाठवण्यास सांगितलं. या मागणीमुळे संतापलेल्या आरोपीनं वृद्धाला ढकलून दिलं. यामुळे तो पडला आणि त्याच्या डोक्याला दुखापत झाली. आरोपीनं तत्काळ दुकानाचे शटर खाली पाडले आणि नाईकचा गळा दाबून खून केला. यानंतर त्यानं बाथरूममध्ये मृतदेह लपवून ठेवला.
३१ ऑगस्टपर्यंत नाईकचा मृतदेह शौचालयात राहिला. पहाटे ५ वाजता आरोपीनं नाईकचा मृतदेह बेडशीटमध्ये गुंडाळला आणि तो दुचाकीवर घेऊन तलावामध्ये फेकण्यासाठी निघाला. ही संपूर्ण घटना सीसीटीव्हीमध्ये कैद झाली आहे. आरोपीनं दिलेल्या निवेदनात सांगितलंय की, त्यानं मृत व्यक्तीचे कपडे आणि मोबाईल कचराकुंडीत फेकून दिले. या वस्तू अद्याप सापडलेल्या नाहीत.
