नागपूर (वृत्तसंस्था) कपिलनागर पोलीस (Police) स्टेशन हद्दीत आजोबानेच आपल्या 13 वर्षीय नातीवर अत्याचार केल्याची धक्कदायक घटना उघडकीस आली आहे. या प्रकरणी गुन्हा दाखल करण्यात आला असून आरोपी आजोबाला अटक करण्यात आली आहे.
काय आहे संपूर्ण प्रकरण ?
कपिलनागर पोलीस स्टेशन हद्दीत आजोबानेच आपल्या 13 वर्षीय नातीवर अत्याचार केल्याची घटना उघडकीस आली. पोलिसांनी आरोपी आजोबाला अटक केली. पीडित अल्पवयीन मुलीला आई, वडील, एक भाऊ, एक बहीण आहे. पीडिता सर्व भावंडामध्ये मोठी आहे. वडील खासगी काम करतात. तर, आई गृहिणी आहे. गेल्या वर्षांपासून पीडितेचे आई-वडील आणि सर्व कुटुंब आईच्या माहेरी राहायला गेले. घरचे सर्वच झोपले होते. रात्री आईला जाग आली. तिच्या शेजारी झोपलेली पीडिता ही तिला दिसली नाही. ती कुठे गेली असेल म्हणून आईने घरच्या हॉलमध्ये जाऊन बघितले. जे चित्र तिला दिसले ते पाहून तिच्या पायाखालची जमीनच सरकली. आजोबा आणि नाती नको त्या अवस्थेत तिला दिसून आले. आईने तिच्या आजोबांना हटकले. आईने तिच्या वडिलांची अर्थात मुलीच्या आजोबांची विचारपूस केली. त्यांनी उडवाउडवीची उत्तरे दिली. त्यानंतर आईने मुलीला विश्वासात घेतले.
आरोपीला पोलीस कोठडी
पीडितेने सांगितले की, १३ एप्रिल 2021 रोजी घरी आजोबा आणि पीडिता याव्यतिरिक्त कुणीही नव्हते. या दिवशी आजोबांनी तिच्या एकटेपणाचा फायदा घेतला. तिच्यासोबत जबरी शारीरिक संबंध प्रस्थापित केले. याबाबत कुणाला सांगितल्यास घरातून हाकलून लावीन, अशी धमकी दिली. त्यानंतर आजोबांनी अनेकदा तिच्यासोबत दृष्कृत्य केल्याचे पीडितेने सांगितले. घराची बदनामी नको, म्हणून तक्रार देण्यास टाळले. पण, त्यानंतरही आजोबांचे असले प्रकार सुरूच होते. त्यामुळं पीडितेच्या आईने कपिलनगर पोलिस ठाणे गाठले आणि तक्रार दिली. आरोपीला न्यायालयाने पोलीस कोठडी सुनावली आहे.
