कल्याण (वृत्तसंस्था) आधारवाडी कारागृहातील (Adharwadi Jail) दोन बंदिवान कैद्यांनी एका तुरुंग अधिकाऱ्याच्या अंगावर मानवी विष्ठा टाकून मारहाण केल्याची घटना समोर आली आहे. विशेष म्हणजे तुरुंग अधिकाऱ्याला मारहाण केल्यानंतर कैद्यांनी स्वतःच्याच गळ्यावर धारदार पत्राने वार करून जखमी केले. याप्रकरणी खडकपाडा पोलीस ठाण्यात दोन्ही बंदिवान कैद्यांवर विविध कलमानुसार गुन्हा दाखल करण्यात आला आहे.
कल्याण मध्ये पश्चिमेला आधारवाडी कारागृह आहे. या कारागृहात आरोपी कैदी लखन अंकुश जाधव आणि रवींद्र धनाजी भोसले शिक्षा भोगत आहेत. १३ एप्रिल रोजी सकाळी सव्वा अकराच्या सुमारास तुरुंग अधिकारी बाविस्कर हे कारागृहातील बॅरेक नंबर सात जवळ आले होते, यावेळी या दोन कैद्यांनी पूर्वनियोजित कट करून तुरुंग अधिकाऱ्यावर मानवी विष्ठा अंगावर फेकली. तसेच त्या दोन कैद्यांनी त्यांना मारहाण केली.
यानंतर कारागृहातील इतर अधिकाऱ्यांनी आणि कर्मचारी घटनास्थळी येताच या कैद्यांनी लोखंडी धारदार पत्र्याने स्वतःवरच वार केले. यामध्ये त्यांच्या मानेवर जखम झाली आहे. याप्रकरणी खडकपाडा पोलीस ठाण्यात दोन्ही बंदीवान कैद्यांवर विविध कलमानुसार गुन्हा दाखल करण्यात आला आहे. पुढील तपास पोलीस करत आहेत.
