सांगली (वृत्तसंस्था) गणेश विसर्जन मिरवणुकीत डीजेच्या तीव्र आवाजाने जिल्ह्यात दोन तरुणांचा मृत्यू झाल्याची धक्कादायक घटना घडली आहे. शेखर सुखदेव पावशे (वय ३२, रा. कवठेएकंद ता. तासगाव) आणि प्रवीण यशवंत शिरतोडे (वय ३५, रा. दुधारी ता. वाळवा), दोघं मृत तरुणांची नावं आहेत.
शेखर पावशे या तरुणाला हृदयरोगाचे निदान झाले होते. त्यामुळे त्याची नुकतीच अँजिओप्लास्टी झाली होती. गावातील विसर्जन मिरवणुकाला शेखर गेला. संपूर्ण गावात डीजेचा दणदणाट सुरू होता. मिरवणुकीत चालणाऱ्या शेखरला मिरवणुका स्टॅन्ड चौकात आल्यानंतर रात्री १० वाजेच्या डॉल्बीचा आवाज त्याला सहन झाला नाही. अचानक अस्वस्थ वाटू लागले. त्रास वाढू लागल्यामुळे तो घरी परतला. परंतू घरात येताच भोवळ येऊन तो खाली पडला. छातीत असह्य वेदना होऊ लागल्याने त्याला तासगावला खासगी रुग्णालयात नेण्यात आले; पण उपचारांपूर्वीच त्याचा मृत्यू झाला होता.
तर दुसऱ्या घटनेत दुधारी (ता. वाळवा) येथे घडली. प्रवीण शिरतोडे याचा सेंट्रिग व्यवसाय आहे. सोमवारी सायंकाळी कामावरून घरी पोहोचल्यानंतर तो विसर्जन मिरवणुकीत गेला. काही वेळातच डीजेच्या दणदणाटाने त्याला अस्वस्थ होऊ लागले. मित्रांसोबत नाचत असतानाच चक्कर येऊन खाली पडला. त्याला त्वरित खासगी रुग्णालयात नेले; परंतु डॉक्टरांनी मृत ‘घोषित केले.
