मुंबई (वृतसंस्था) साहित्य, चित्रपट, संगीत, अभिनय, नाटक आणि समाजसेवा अशा विविध क्षेत्रात योगदान दिलेल्या पु.ल. देशपांडे यांच्या सारख्या बहुआयामी व्यक्तिमत्त्वाची गुगलने खास दखल घेतली आहे. पु.ल. देशपांडे यांची आज १०१ वी जयंती आहे. त्यानिमित्ताने गुगलने एक डूडल साकारत त्यांना मानवंदना दिली आहे.
मुंबईत राहणाऱ्या समीर कुलावूर या कलाकाराने हे खास डुडल तयार केले आहे. पु.ल. देशपांडे यांच्या जीवन आणि कार्याची संपूर्ण माहिती या डूडलच्या निमित्ताने मिळत आहे. गुगलने साकारलेल्या या डूडलमध्ये पुलं हे हार्मोनियम वाजवताना दिसत आहेत. तसेच त्यांच्या मागे विविध रंगांची उधळणही केल्याचं दिसत आहे. ‘गूगल आर्ट्स अ‍ॅण्ड कल्चर’ या विभागात पु ल देशपांडे यांच्या जीवनकार्याचा वेध यात घेतला आहे. लोकप्रिय मराठी लेखक, नाटककार, नट, कथाकार व पटकथाकार, दिग्दर्शक आणि संगीत दिग्दर्शक अशा कित्येक भूमिका त्यांनी बजावल्या. हजरजबाबीपणा ही त्यांची खास ओळख. त्यातून आलेले अनेक किस्से आजही चर्चेत असतात. पु.ल. देशपांडे यांचे मराठी भाषेवर विलक्षण प्रभुत्व होते. त्यांच्या भाषाप्रभुत्वाचे अनेक किस्से आहेत. पु.ल. देशपांडे यांच्या जन्म निमित्ताने गूगल आर्ट्स अ‍ॅण्ड कल्चर विभागातील पुलंविषयीचे खास दालन खुले करण्यात आले आहे. या डूडलमुळे पु. ल. देशपांडे हे अष्टपैलू व्यक्तिमत्त्व आता जागतिक स्तरावर पोहोचले आहे. गूगलने केलेल्या दालनामध्ये पुलंच्या बहुआयामी योगदानाचा वेध घेण्यात आला आहे.
