पारोळा (प्रतिनिधी) तालुक्यातील म्हसवे शिवारातील एका ढाब्यावर अंमली पदार्थांची तस्करी करणाऱ्यांवर पारोळा पोलिसांनी छापा टाकला. तस्करी करणाऱ्यांकडून तब्बल १६४ किलो ६८४ ग्रॅम वजनाचे अफूचे सुकलेले बोंडे जप्त केले आहेत. या कारवाईत अंमली पदार्थांसह एक ट्रक, एक हॅरियर कार आणि रोख रक्कम असा एकूण ५० लाखांहून अधिक किमतीचा मुद्देमाल जप्त करण्यात आला आहे.
पारोळा तालुक्यातील म्हसवे शिवारात असलेल्या ‘श्री रामदेव राजस्थानी ढाबा’ येथे काही इसम अंमली पदार्थांची देवाणघेवाण करत असल्याची माहिती पारोळा पोलिसांना मिळाली. त्यानुसार तात्काळ सापळा रचून पोलीस निरीक्षक अशोक पवार आणि सहायक पोलीस निरीक्षक योगेश महाजन यांच्या मार्गदर्शनाखाली पथकाने छापा टाकला. या छाप्यात एका अंमली पदार्थाची तस्करी करणाऱ्यास रंगेहाथ पकडण्यात आले, तर त्याचे तीन ते चार साथीदार अंधाराचा फायदा घेऊन पळून गेले. या पळून गेलेल्या आरोपींनी आपली दोन वाहने सोडून पळ काढला, त्यापैकी एक हॅरियर कार पोलिसांनी नंतर जप्त केली.
वाहनांसह ५० लाखांचा मुद्देमाल जप्त
पोलिसांनी केलेल्या या कारवाईत संशयित शैतानाराम मानाराम विश्नोई (वय ३४, रा. राजस्थान) याला अटक करण्यात आली. त्याच्या ताब्यातून १३ लाख १७ हजार रूपये किंमतीचा १६४ किलो ६८४ ग्रॅम वजाचा अफूचे बोंडे, २० लाख रूपये किंमतीची टाटा कंपनीचा ट्रक क्रमांक (आरजे १९, सीजे २१११), १० हजाराचा वजन काटा, २ लाख ५५ हजार ४७० रूपये रोख, १५ लाख रुपये किमतीची टाटा कंपनीची कार असा एकुण ५० लाख ८२ हजार ९४२ रुपयांचा मुद्देमाल जप्त केला आहे.
आरोपींविरुद्ध गुन्हा दाखल
या प्रकरणी पारोळा पोलीस स्टेशनमध्ये आरोपी शैतानाराम विश्नोई आणि त्याच्या फरार साथीदारांविरुद्ध एनडीपीएस कायद्यांतर्गत गुन्हा दाखल करण्यात आला आहे. पुढील तपास सहायक पोलीस निरीक्षक योगेश महाजन करत आहेत.
