नागपूर (वृत्तसंस्था) रविवारी मध्यरात्री १२.३० वाजण्याच्या सुमारास पार्टीवरून येणाऱ्या मद्यधुंद कारचालकाने फुटपाथवर झोपलेल्या ९ जणांना चिरडले. त्यात दोघांचा मृत्यू झाला, तर पाच जण गंभीर जखमी आहेत. वाठोडा पोलीस ठाण्याच्या हद्दीतील दिघोरी चौकाजवळ हा अपघात झाला. त्यात कांतीबाई बागडिया (४२) व सीताराम बागडिया (३०) यांचा मृत्यू झाला, चिमुकल्यांसह पाच जण जखमी झाले.
चालकाचे नियंत्रण सुटले व कार थेट फुटपाथवर चढली !
वाढदिवसाची पार्टी करून ७ मित्र कारने घरी परतत होते. हे सर्वजण दारू प्यायले होते. दरम्यान, उमरेड मार्गाकडे जाणाऱ्या भरधाव कारच्या चालकाचे नियंत्रण सुटले व कार थेट फुटपाथवर चढली. यावेळी रस्त्यावर खेळणी विकून उदरनिर्वाह करणारे फुटपाथवर झोपले होते. त्यांच्या अंगावरून ही कार गेली. यात ३ महिला, ३ मुले व एक पुरुष जखमी झालेत. यात एका महिलेचा घटनास्थळी, तर पुरुषाचा रुग्णालयात उपचारादरम्यान मृत्यू झाला. घटनेनंतर पोलिसांनी तातडीने जखमींना रुग्णालयात नेले. त्यानंतर पसार झालेल्या सातही आरोपींचा शोध घेऊन त्यांच्याविरोधात विविध कलमांन्वये गुन्हा दाखल केला.
वाढदिवसाची पार्टी करून निघाले मित्र
मित्रांसोबत पार्टी करून चालक भूषण नरेश लांजेवार (२०, दिघोरी) हा दारूच्या नशेत कार चालवत उमरेडच्या दिशेने निघाला. त्याचे नियंत्रण सुटले व त्याने कांतीबाई व सीताराम यांना धडक दिली. त्यानंतर, कार फुटपाथवर झोपलेल्यांच्या अंगावरून गेली. पळून जाण्यासाठी त्याने कार रिव्हर्स घेतली व पुन्हा एका चिमुकल्याच्या अंगावरून नेली. पोलिसांनी राजेंद्र बागडियांच्या तक्रारीवरून आरोपीविरोधात गुन्हा दाखल करत अटक केली.
सहा मुलांना अटक
पोलिसांनी चालक भूषणसह कारमधील वंश झाडे (१९), सन्मय पात्रीकर (२०), अथर्व बानाईत (२०), ऋषिकेश चौबे (२०) व अथर्व मोगरे यांच्याविरोधात गुन्हा दाखल करून अटक केली. वंशच्या वाढदिवसाची पार्टी सर्व जण फिरायला निघाले होते.
