कोलकाता (वृत्तसंस्था) पश्चिम बंगाल विधानसभा निवडणूक २०२१ दरम्यान आज (मंगळवारी) तिसऱ्या टप्प्यात मतदान सुरू आहे. बंगालमध्ये आज एकूण ३१ जागांवर मतदान होतंय. दरम्यान, त्यापूर्वी बंगालमध्ये एक खळबळजनक प्रकार घडला असून एका टीएमसी नेत्याच्या घरी ४ इलेक्ट्रॉनिक वोटिंग मशिन्स अर्थात EVM आणि 4 वोटर-व्हेरिफिएबल पेपर ऑडिट ट्रेल सापडले आहेत. उलूबेरिया विधानसभा मतदारसंघात सोमवारी रात्री ही घटना उघडकीस आली.
या प्रकरणामध्ये सेक्टर अधिकाऱ्याला निलंबित करण्यात आलं आहे. तृणमूल नेत्याच्या घरी आढळून आलेले ईव्हीएम हे रिझर्व्ह म्हणजेच अतिरिक्त ईव्हीएम होते. मात्र आता त्यांचा वापर निवडणुकीसाठी केला जाणार नाही. या प्रकरणामध्ये सर्व दोषींविरोधात गंभीर कारवाई केली जाईल,” असं निवडणूक आयोगाने स्पष्ट केलं आहे. याबद्दल अधिक माहिती देताना, “हावडा जिल्ह्यातील विधानसभा श्रेत्र १७७ उलुबेरिया उत्तरमधील सेक्टर १७ येथे निवडणूक अधिकारी असणाऱ्या तपन सरकार यांना अतिरिक्त ईव्हीएमसहीत पाठवलं होतं. मात्र हा अधिकारी आपल्या नातेवाईकाच्या घरी जाऊन झोपी गेल्याने हा गोंधळ झाला. असं करणं हे निवडणूक आयोगाच्या नियमांचं उल्लंघन आहे. त्यामुळेच या अधिकाऱ्याला निलंबित करण्यात आलं असून त्याच्यावर कठोर नियमांअंतर्गत कार्यवाही केली जाईल,” असंही निवडणूक आयोगाने स्पष्ट केलं आहे.
पश्चिम बंगालमध्ये तिसऱ्या टप्प्यात आज ३१ जागांसाठी मतदान होत आहे. सकाळी सात वाजल्यापासूनच मतदारांचा उत्साह दिसून येत आहे. दक्षिण २४ परगना जिल्ह्यामध्ये (भाग २) १६ जागांवर, हावडा (भाग १) येथे सात जागांव आणि हुगळी (भाग १) येथील आठ जागांसाठी आज मतदान होत आहे. मतदानाच्या वेळेस करोनासंदर्भातील नियमांची अंमलबजावणी केली जात असून तापमान तपासूनच मतदारांना मतदानासाठी प्रवेश दिला जातोय.
दरम्यान भाजपचे उमेदवार चिरन बेरा यांनी असा आरोप केला आहे की, या मशीन्स टीएमसी नेते गौतम घोष यांच्या तुलसीबेरीया याठिकाणच्या घरात सापडल्या आहेत. त्यांनी असा देखील आरोप केला आहे इलेक्शन ड्यूटीच्या कारमधून या मशिन्स आणण्यात आल्या आहेत. त्यांच्या मध्ये सेक्शन १७ मध्ये इलेक्शन ड्यूटीसाठी असणारी गाडी या टीएमसी नेत्याच्या घराबाहेर उभी होती.
