रावेर ( प्रतिनिधी ) – शरीर सुखाच्या मागणीस नकार दिल्याच्या कारणावरून रावेर तालुक्यातील निमड्या येथील आठ महिन्याच्या गरोदर महिलेचा तिच्याच पतीने गळा दाबून खून केल्याचा गुन्हा रावेर पोलीस ठाण्यात दाखल करण्यात आला आहे.
याबाबतचे वृत्त असे की निमड्या येथील लालू बाई शरद पावरा (वय २५) ही महिला दि. ४ मार्च रोजी घरातून बाहेर गेली होती. दि. ५ मार्च रोजी दुपारी बारा वाजता तिचा मृतदेह सातपुडा पर्वत भागतील दुर्गम भागातील दरीत गळफास घेतलेल्या स्थितीत आढळून आला होता. ही महिला आठ महिन्याची गरोदर असल्यामुळे तिचे शवाचे दि. ६ मार्च रोजी जळगाव येथे शवविच्छेदन करण्यात आले होते. पोलीस निरीक्षक डॉ. विशाल जयस्वाल यांच्या मार्गदर्शनाखाली पोलीस उपनिरीक्षक मनोज महाजन, पोलीस हेडकॉन्स्टेबल ईश्वर चव्हाण, जगदीश पाटील, कल्पेश आमोदकर व इस्माईल तडवी यांनी तपास करून या महिलेचा पती शरद मिरलाल पावरा (रा. निमड्या) यांने त्याच्या पत्नीचा खुन केल्याचे तपासात निष्पन्न झाले. त्याची पत्नी लालूबाई आठ महिन्याची गरोदर असताना त्याने पत्नीस शरीर सुखाची मागणी केली होती. पत्नीने यास नकार दिल्यामुळे पती शरद याने संतप्त होऊन पत्नी लालू बाई हिचा गळा दाबून खून केल्याचे तपासात निष्पन्न झाले. यावरून अंधारमळी येथील पोलीस पाटील रमजान तडवी यांनी रावेर पोलीस ठाण्यात दिलेल्या फिर्यादीवरून शरद पावरा याच्या विरुद्ध गुन्हा दाखल करण्यात आला आहे. पुढील तपास पोलीस उपनिरीक्षक मनोज महाजन करीत आहेत .
