यवतमाळ (वृत्तसंस्था) पुसद येथील इटावा वार्डातील भिलवाडी परिसरातील महिलेचा कुलरचा शॉक लागून मृत्यू झाला. ही घटना १७ ऑक्टोबर रोजी दुपारी १२ ते १ वाजेच्या दरम्यान घडली. रेखा विकास हगवणे (२६) असे मृत महिलेचे नाव आहे.
वातावरणातील बदलामुळे व ढगाळी वातावरणामुळे प्रचंड उकाडा जाणवत आहे. त्यामुळेच नागरिकांनी अडगळीत ठेवलेले कुलर, एसी सुरू केलेत. अशात दुपार दरम्यान प्रचंड उकाडा जाणवत असल्यामुळे रेखा हगवणे यांनी घरातील कुलर सुरू केला. दरम्यान काळाने घाला घालत आपला डाव साधला. कुलरचा जबर करंट लागून त्यांचा मृत्यू झाला. त्यांना एक बारा वर्षाचा मुलगा तर एक बालवाडीमध्ये शिकणारा तीन वर्षाचा मुलगा आहे. त्यांच्या पश्चात पती व दोन मुले आहेत. या घटनेने सर्वत्र हळहळ व्यक्त होत आहे.
