एरंडोल (प्रतिनिधी) येथील तक्रारदार यांचे पत्नीच्या नावे असलेल्या नगरपालिका दुकान संकुलातील करार संपल्याने सील केलेले गाळे लिलावामध्ये ताब्यात देऊन तसेच तक्रारदार यांच्या इतर गाळ्याना नोटिस न देण्यासाठी दीड लाखाची लाच स्वीकारताना पालिका कार्यालय अधीक्षकाला एसीबीच्या पथकाने रंगेहात पकडले आहे.
याबाबत वृत्त असे की, एरंडोल येथील तक्रारदार यांचे पत्नीच्या नावे असलेल्या नगरपालिका दुकान संकुलातील करार संपल्याने सील केलेले गाळे लिलावामध्ये ताब्यात देऊन तसेच तक्रारदार यांच्या इतर गाळ्याना नोटिस न देण्यासाठी मागणी केली असता एरंडोल नगर परिषद, कार्यालय अधीक्षक संजय दगडू धमाळ याने पंच साक्षीदार यांच्या समक्ष दोन लाख रुपयांची लाचेची मागणी करून दीड लाख रुपयांची लाच स्वीकारतांना नाशिक पोलीस अधीक्षक सुनील कुऱ्हाडे, अपर पोलीस अधीक्षक निलेश सोनवणे यांच्या मार्गदर्शनाखाली धुळे पोलीस पथकाने आरोपीस रंगेहात पकडले आहे.
सापळा रचून अटक
धुळे पोलीस उपअधीक्षक सुनील कुराडे, पोलीस निरीक्षक मंजितसिंग चव्हाण, पोलीस निरीक्षक प्रकाश झोडगे यांच्या पथकातील सुधीर सोनवणे, संतोष हिरे, कृष्णकांत वाडीले, प्रशांत चौधरी, राजन कदम, सुधीर मोरे यांनी सापळा रचून कार्यालय अधीक्षक संजय दगडू धमाळ याला लाच स्वीकारतांना ताब्यात घेतले आहे.