अमळनेर (प्रतिनिधी) दोन दिवसांपासून घरात कोणाला काहीही न सांगता बेपत्ता झालेल्या परप्रांतीय तरुणीचा मृतदेह राहणाऱ्या भागातील नजीकच्या विहिरीत आढळून आल्याने एकच खळबळ उडण्याची घटना बुधवारी दुपारी उघडकीला आली आहे. या संदर्भात मारवड पोलीस ठाण्यात आकस्मात मृत्यूची नोंद करण्यात आली आहे.
रिनाबाई बिरबल पाडवी (वय २४ रा. पानसेमल ता.बडवानी मध्यप्रदेश ह.मु.चौबारी ता.अमळनेर), असे मयत झालेल्या परप्रांतीय तरूणीचे नाव आहे. ती आपल्या परिवारासह वास्तव्याला होती. सोमवारी १२ ऑगस्ट रोजी सायंकाळी ६.३० वाजता रिनाबाई पडवी हीने घरात कुणाला काहीही न सांगता घरातून कुठेतरी निघून गेली. त्यानंतर तिच्या नातेवाईकांनी तिचा शोध घेतला परंतू तिच्या संदर्भात कोणतीही माहिती मिळाली नसल्याने मारवड पोलीसात बेपत्ता झाल्याची खबर दिली. त्यानुसार बेपत्ता झाल्याची नोंद करण्यात आली. दरम्यान, तिचा शोध सुरू असतांना बुधवारी १४ ऑगस्ट रोजी दुपारी ४ वाजता गावातील राहत असलेल्या परिसरातील विहिरीत तिचा मृतदेह आढळून आला. या घटनेची माहिती मिळाल्यानंतर तिच्या नातेवाईकांसह मारवड पोलीसांनी घटनास्थळी धाव घेतली. यावेळी नातेवाईकांनी आक्रोश केला होता. याप्रकरणी मारवड पोलीस ठाण्यात घटनेची नोंद करण्यात आली आहे.
