खळबळजनक! मुक्ताईनगर येथे रक्षा खडसेंच्या मुलीची छेड

जळगाव (प्रतिनिधी) जिल्ह्यातील मुक्ताईनगर येथे एक खळबळजनक घटना घडली आहे. भाजप नेत्या आणि केंद्रीय मंत्री रक्षा खडसे यांच्या मुलीची टवाळखोरांनी छेड काढल्याची घटना समोर आली आहे. माझ्या मुलींसोबत पोलीसांच्या ड्रेसमधील माणूस असताना त्यांच्यासोबत हा प्रकार घडत असेल तर हे फार गंभीर आहे. मी मुख्यमंत्र्‍यांशी दोन वेळा बोलली, त्यांनीही सूचना दिली आहे, अशी माहिती केंद्रीय मंत्री रक्षा खडसेंनी दिली आहे.

मिळालेल्या माहितीनुसार, मुक्ताईनगर तालुक्यातील कोथळी गावात मुक्ताबाई यात्रेदरम्यान एका 18 वर्षीय युवतीसह तिच्या मैत्रिणींची छेडछाड केली. यातील पहिली घटना 24 फेब्रुवारी 2025 रोजी दुपारी 12:30 वाजेच्या सुमारास फराळ वाटपाच्या कार्यक्रमाच्या स्टॉलजवळ घडली. या ठिकाणी आरोपी अनिकेत भोई याने या मुलींकडे पाहून अश्लील हातवारे केले. यानंतर 28 फेब्रुवारी 2025 रोजी रात्री 8:45 वाजता या मुली यात्रेत फिरत असतांना आकाश पाळण्याजवळ अनिकेत भोई याच्यासह पियुष मोरे, सोहम कोळी, अनुज पाटील, किरण माळी, चेतन भोई आणि सचिन पालवे यांनी फिर्यादी व तिच्या मैत्रीणींचा पाठलाग करून त्यांच्या सोबत लज्जास्पद कृत्य करत विनयभंग केला. तसेच त्यांनी या मुलींचा व्हिडीओ मोबाईलमध्ये काढला.

दरम्यान, या प्रकरणी मुक्ताईनगर पोलीस स्थानकात सदर 18 आणि 16 वर्षे वयाच्या मुलींनी दिलेल्या फिर्यादीवरून मुक्ताईनगर पोलीस स्थानकात 1) अनिकेत भोई, 2) पियुष मोरे, 3) सोहम कोळी, 4) अनुज पाटील, 5) किरण माळी, 6) चेतन भोई आणि 7) सचिन पालवे (सर्व राहणार मुक्ताईनगर) यांच्या विरोधात गुन्हा नोंदविण्यात आला आहे.

या सर्वांच्या विरोधात भारतीय न्याय संहिता कलम 75 (1) (आय); 78 (2); 79; 189 (2); सह लैंगीक अत्याचारापासून बालकांचे संरक्षण अधिनियम कलम 8 आणि 12 तसेच माहिती तंत्रज्ञान अधिनियम कलम 66 (ई) अन्वये गुन्हा नोंदविण्यात आला आहे. पुढील तपास मुक्ताईनगरचे पोलीस निरिक्षक नागेश मोहिते व सहायक पोलीस निरिक्षक जयेश पाटील हे करत आहेत.

काय म्हणाल्या रक्षा खडसे
केंद्रीय मंत्री रक्षा खडसे यांच्या मुलीची काही टवाळखोर मुलांनी छेडछाड काढली. मुक्ताईनगर कोथळी गावातील यात्रेदरम्यान हा प्रकार घडला. याप्रकरणी रक्षा खडसे यांनी आक्रमक पावित्रा घेत तक्रार दाखल केली. यानंतर रक्षा खडसे यांनी नेमकं काय घडलं, याबद्दलची सविस्तर माहिती दिली. महाशिवरात्रीच्या निमित्ताने संत मुक्ताबाईंची यात्रा असते. त्या यात्रेनिमित्त अनेक लोक सहभागी होत असतात. परवा रात्री मी गुजरातला होते. आज सकाळीच मी इथे आली. परवा माझ्या मुलींचा फोन आला, त्यांनी मला यात्रेत जायचं असं सांगितलं. मी त्यांना सांगितल की सुरक्षारक्षकाला सोबत घेऊन जा. तसेच तुझ्या मैत्रिणी आणि ऑफिसमधील दोन तीन लोकांना सोबत घेऊन जा. कारण दरवर्षी गर्दी असते. धक्काबुक्की होते. त्यामुळे थोडी सुरक्षा असायला हवी. पण तिथे गेल्यानंतर काही टवाळखोर मुलांनी त्यांचा पाठलाग केला, असे रक्षा खडसेंनी म्हटले. त्यांच्या पाळण्यात शेजारी जाऊन बसले. आमच्या सुरक्षारक्षकाने त्यांना दुसऱ्या पाळण्यात बसवलं, तर तिथेही ही टवाळखोर मुलं त्यांना त्रास द्यायला लागले. तसेच सुरक्षारक्षकालाही धक्काबुक्की केली. मुलींचीही छेड काढली. सत्ता कोणाचीही असो, शेवटी प्रशासनाकडे जेव्हा तक्रार येतात, तेव्हा गंभीर कारवाई झाली पाहिजे. माझ्या मुलींसोबत पोलीसांच्या ड्रेसमधील माणूस असताना त्यांच्यासोबत हा प्रकार घडत असेल तर हे फार गंभीर आहे. मी मुख्यमंत्र्‍यांशी दोन वेळा बोलली, त्यांनीही सूचना दिली आहे, अशी माहिती रक्षा खडसेंनी दिली आहे.

आरोपींवर कडक कारवाई होईल – देवेंद्र फडणवीस
दुर्देवाने या प्रकरणात विशिष्ट पक्षांचे काही पदाधिकाऱ्यांचा समावेश आहे. त्यांनी अतिशय वाईट प्रकारचं काम केलंय. पोलिसांनी आरोपींविरोधात गुन्हा दाखल केलेला आहे. काहींना अटक देखील झालेली आहे. इतरांनाही अटक होईल. पण अशा प्रकारे छेडछाड करणं, सार्वजनिक ठिकाणी त्रास देणं, अत्यंत चुकीचं आहे. कुठल्याही परिस्थिती अशा लोकांना माफी देता कामा नये. आरोपींवर अतिशय कडक कारवाई होईल’, अशा शब्दात मुख्यमंत्री देवेंद्र फडणवीस यांनी संताप व्यक्त केला आहे