कोझिकोड (वृत्तसंस्था) केरळमध्ये प्रवासी ट्रेनमध्ये स्फोटकांचा साठा सापडल्याने खळबळ उडाली आहे. केरळमधील कोझिकोड रेल्वे स्थानकातील चेन्नई मंगलपुरम एक्सप्रेसमध्ये मोठ्या प्रमाणात स्फोटकांचा साठा सापडला आहे. रेल्वे सुरक्षा दलाने ट्रेनमधून १०० हून अधिक जिलेटिन कांड्या आणि ३५० डिटोनेटर जप्त केले आहेत. याप्रकरणी एका महिलेला अटकही करण्यात आली आहे.
ट्रेनमध्ये स्फोटकं सापडल्यानंतर एका संशयित महिलेला देखील अटक करण्यात आली आहे. रमानी असं ताब्यात घेण्यात आलेल्या महिलेचं नाव आहे. ही महिला मूळची तामिळनाडूची आहे. ट्रेनमध्ये ही महिला ज्याठिकाणी बसली होती, त्याठिकाणच्या सीटखालून हा साठा जप्त करण्यात आला आहे. मिळालेल्या माहितीनुसार, महिलेने असे मान्य केले आहे की विहिर खोदण्याच्या कामासाठी तिने जिलेटिनच्या कांड्या आणल्या होत्या. रेल्वे पोलीस सध्या याप्रकरणी अधिक चौकशी करत आहेत.
मुंबई अंबानीच्या घराबाहेर स्फोटकं
मुंबईत काल मुकेश अंबनी यांच्या मुंबईतील बंगल्यासमोर एक अनोळखी कार संशयास्पदरित्या पार्क करण्यात आली होती. ही बाब समोर आल्यानंतर यथे बॉम्ब स्कॉड पथक, एसएसजी कमांडो तसेच मुंबई सह पोलीस आयुक्त विश्वास नांगरे पाटीलही घटनास्थळी दाखल झाले होते. बॉम्ब नाशक पथकाने या गाडीची तपासणी केली असता त्यामध्ये २० जिलेटीनच्या कांड्या तसेच एक निनावी पत्रही आढळले होते. या पत्रामध्ये ‘ही फक्त झलक आहे’ अशा आशयाचा मजकूर लिहलेला असल्याचे समोर आले होते.
जिलेटिन म्हणजे काय?
जिलेटिन हा एक प्रकारचा स्फोटक आहे जो द्रव किंवा घन स्वरूपात वापरला जातो. हा एक गन-कॉटन स्वरुपातील स्फोटक आहे. भारतात हे स्फोटक पर्वत तोडण्यासाठी आणि खाणींमध्ये वापरतात. ते खरेदी करण्यासाठी किंवा ठेवण्यासाठी परवाना आवश्यक आहे. शासन त्याचे प्रमाण आणि उपयोग ठरवते. ट्रिगर मिळाल्यावर जिलेटिनचा स्फोट होतो. नक्षलवादी संघटनेशिवाय दहशतवादी संघटनांकडूनही याचा वापर केला जातो.
