जळगाव (प्रतिनिधी) गोदावरी फाउंडेशन संचलित गोदावरी अभियांत्रिक महाविद्यालय जळगाव व हॉकी असोसिएशन जळगाव यांच्या संयुक्त विद्यमाने आयोजित राष्ट्रीय क्रीडा दिवस कार्यक्रम अंतर्गत २०२२ चा क्रीडा गौरव पुरस्कार जैन स्पोर्ट्स अकॅडमीचे माजी क्रीडा समन्वयक फारुक शेख अब्दुल्ला यांना नुकताच प्रदान करण्यात आला आहे.
डॉक्टर अब्दुल कलाम आझाद हॉल गोदावरी अभियांत्रिक महाविद्यालयात गोदावरी फाउंडेशनच्या संचालिका डॉक्टर केतकी पाटील यांच्या हस्ते प्रदान करण्यात आला. यावेळी डॉक्टर वैभव पाटील, जिल्हा क्रीडा अधिकारी मिलिंद दीक्षित, सेंट्रल रेल्वे चे विवन राड्रिंक्स, प्राचार्य डॉक्टर विजय पाटील इंजिनिअरिंग कॉलेज व मॅनेजमेंट चे प्राचार्य डॉक्टर प्रशांत वारके उपस्थित होते. यावेळी जिल्ह्यातून दोन क्रीडा जीवनगौरव पुरस्कार व १५ गुणवंत क्रीडा संघटक( क्रीडा शिक्षक) पुरस्कार देण्यात आले.
फारुक शेख यांच्या क्रीडा गुण मूल्यमापन आधारे पुरस्कार
शेख यांच्या मागील २५ वर्षातील जैन स्पोर्ट्स अकादमी च्या माध्यमातून केलेल्या विविध क्रीडा गुणांचा अभ्यास करून तसेच त्यांना मिळालेल्या शासकीय, निमशासकीय, माध्यम व इतर सामाजिक व शैक्षणिक संस्थांनी दिलेल्या क्रीडा क्षेत्रातील कामगिरीच्या बाबत समितीने विचार करून कोणत्याही प्रकारचे पुरस्कारासाठी अर्ज न घेता त्यांना क्रीडा जीवन गौरव पुरस्कार घोषित करण्यात आल्याचे आयोजकांनी प्रास्ताविकद्वारे सांगितले.
पद्मश्री डॉक्टर भवरलाल जैन यांना पुरस्कार अर्पित
पुरस्कार प्राप्त झाल्यानंतर सत्काराला उत्तर देताना फारुख शेख यांनी हा पुरस्कार पद्मश्री डॉक्टर भवरलाल जैन यांच्या वारसा, कार्य आणि संस्कृतीला अर्पित केल्याचे घोषित केले. कार्यक्रमाचे सूत्रसंचालन प्राध्यापक डॉक्टर आसिफ खान यांनी तर आभार डॉक्टर शाफिकुर रहेमान यांनी मानले.
