अमळनेर (प्रतिनिधी) – एका शिक्षिकेला अडवून माझ्याशी लग्न कर असे म्हणत जळोद येथील तरुणाने विनयभंग केल्याची घटना १ रोजी दुपारी पावणे तीन वाजेच्या सुमारास मंगळ ग्रह मंदिराच्या पार्किंगसमोरील रस्त्यावर घडली.
या संदर्भात पीडित शिक्षिकेने फिर्याद दिली आहे. त्या १ रोजी पावणे तीन वाजेच्या सुमारास त्यांच्या सहकाऱ्यांसोबत आपापल्या दुचाकीने मंगळ ग्रह मंदिराच्या पार्किंग समोरील रस्त्याने जात होते. या वेळी पीडित शिक्षिका ही एका सहकाऱ्यासोबत डबलसीट जात होत्या. या वेळी जळोद येथील हिरालाल ज्ञानेश्वर रायसिंग हा दुचाकीने आला अन् त्याने त्यांची दुचाकी अडवली. त्यानंतर खाली उतरून शिक्षिकेचा हात धरून तू माझ्याशी लग्न कर, असे म्हणत त्यांचा विनयभंग केला. या संदर्भात पीडित शिक्षिकेने घरी जाऊन ही बाब आपल्या आईला सांगितली. त्यानंतर अमळनेर पोलीस ठाण्यात दिलेल्या फिर्यादीवरुन भारतीय न्यायसंहिता कलम ७४, १२६ (२) प्रमाणे हिराराल रायसिंग याच्याविरुद्ध गुन्हा दाखल करण्यात आला आहे. तपास हे. कॉ. गणेश पाटील करत आहेत.
