भुसावळ (प्रतिनिधी) शहरातील शिवाजी नगरमधील डी. एल. हिंदी हायस्कूलच्या मैदानावर गुरुवारी सकाळी एका वादातून तिघा तरुणांनी चौघांवर चाकूहल्ला करत बेदम मारहाण केली. या अचानक घडलेल्या प्रकारामुळे परिसरात भीतीचे वातावरण पसरले असून या घटनेत चार तरुण गंभीर जखमी झाले आहेत.
मिळालेल्या प्राथमिक माहितीनुसार, आदिल खान मुकीम खान, शेख साहिल शेख सईद कुरेशी, भावेश शशिकांत बहिरुणे आणि प्रणय गणेश निहारे हे शाळेच्या मैदानावर उभे होते. या वेळी, साहिल ढोले (पूर्ण नाव अस्पष्ट), जावेद शेख उर्फ जावेद पटेल आणि सोहेल कुरेशी हे तेथे आले. काहिशा वादविवादानंतर तिघांनी चौघांवर हल्ला चढवला. दरम्यान, साहिल ढोले याने जवळ असलेल्या धारदार शस्त्राने चारही तरुणांवर हल्ला केला. त्यानंतर जखमींनी थेट भुसावळ बाजारपेठ पोलीस ठाण्यात जाऊन तक्रार दाखल केली. तर घटनेची माहिती मिळताच सहाय्यक पोलीस निरीक्षक नितीन पाटील यांच्या मार्गदर्शनात पोलिसांचे पथक घटनास्थळी दाखल झाले. विभागीय पोलीस अधिकारी संदीप गावित व प्रभारी पोलीस निरीक्षक उद्धव डमाळे यांनीही घटनास्थळाची पाहणी केली असून जखमी तरुणांवर स्थानिक रुग्णालयात उपचार सुरू आहेत. पोलीस पथकाने धडक कारवाई करत आदिल खान व सोहेल कुरेशी यांना चौकशीसाठी ताब्यात घेतले आहे, तर जावेद शेख उर्फ जावेद पटेल फरार असून त्याचा शोध सुरू आहे. या प्रकरणी आदिल खान यांच्या फिर्यादीवरून बाजारपेठ पोलीस ठाण्यात गुन्हा दाखल करण्यात आला आहे. तपास सहाय्यक पोलीस निरीक्षक नितीन पाटील करत आहेत.
पालकांचा संताप अन् वाढली चिंता
या हाणामारीचे काही व्हिडिओ सोशल मीडियावर झपाट्याने व्हायरल झाले असून नागरिकांकडून संताप आणि चिंता व्यक्त होत आहे. विद्यार्थ्यांच्या सुरक्षेचा प्रश्न पुन्हा ऐरणीवर आला असून पालक वर्गातही अस्वस्थता आहे. दरम्यान, ही संपूर्ण घटना सोहेल कुरेशीने इतर तरुणांना बोलावून घडवून आणल्याची प्राथमिक माहिती पोलिसांना मिळाली आहे. परंतु, भांडणाचे नेमके कारण अद्याप स्पष्ट झालेले नाही.
