पाटणा (वृत्तसंस्था) लालूंविरोधात पोलिसांत एफआयआर दाखल केली आहे. चारा घोटाळा प्रकरणात शिक्षा भोगत असतानाही मोबाईलद्वारे बिहारच्या आमदारांना खरेदी करण्याचा प्रयत्न केल्याचा आरोप करत लालूंविरोधात ललन पासवान यांनी पोलिसांत एक एफआयआर दाखल केली आहे.
लालू प्रसाद यादव यांनी आपल्याला २४ नोव्हेंबर रोजी फोन केल्याचं तसंच बिहार विधानसभा अध्यक्षाच्या निवडणुकीत अनुपस्थित राहून मत न दिल्यास आरजेडी सरकारमध्ये मंत्रीपद देण्याचं आमिष दाखवलं, असं बिहारच्या भागलपूर जिल्ह्यातील पीरपैती विधानसभा मतदार संघाचे आमदार ललन पासवान यांनी आपल्या लिखित तक्रारीत म्हटलं आहे. चारा घोटाळ्या प्रकरणातले दोषी आणि राजद अध्यक्ष लालूप्रसाद यादव यांच्या अडचणींत भर पडली आहे. पासवान यांनी पाटणाच्या निगरानी पोलीस स्टेशनमध्ये लालू प्रसाद यादव यांच्याविरोधात ही तक्रार दाखल केली आहे. करोना संक्रमणाच्या पार्श्वभूमीवर, रांचीच्या ‘रिम्स’ संचालकांच्या रिकाम्या पडलेल्या ‘केली’ बंगल्यात लालूप्रसाद यादव यांना हलवण्यात आलं होतं. लालूंवर करण्यात आलेल्या आरोपानंतर गुरुवारी रिम्स प्रशासनानं पुन्हा एकदा लालूंची रवानगी रिम्सच्या पेईंग वॉर्डमध्ये करण्याची तयारी केली आहे. रिम्स प्रशासननानं यासंबंधी आदेशही जारी करताना, लालूंना पेईंग वॉर्ड ११ क्रमांकाच्या खोलीत हलवण्यात येणार असल्याचं सांगितलं. उल्लेखनीय म्हणेज, चारा घोटाळा प्रकरणातील दोषी लालू प्रसाद यादव यांच्या जामीन याचिकेवर शुक्रवारी सुनावणी होणार आहे. याचा थेट परिणाम लालूंच्या जामीन याचिकेवर होऊ शकतो.
