नाशिक (वृत्तसंस्था) सातत्याने होणाऱ्या मारहाणीच्या त्रासामुळे वैतागलेल्या पत्नीने आपल्या अल्पवयीन मुलाच्या मदतीने दारुड्या पतीचा गळा आवळून खून केल्याचा धक्कादायक प्रकार न्यायडोंगरी येथे घडला आहे. संजय गणेश गायकवाड, असे मयताचे नाव आहे.
पतीच्या डोळ्यात मिरची टाकत पत्नीने त्याचा गळा मुलाच्या मदतीने नायलॉनच्या दोरीने आवळला. या प्रकरणी नांदगाव पोलिसांनी संशयित पत्नीसह अल्पवयीन मुलास ताब्यात घेतले आहे. न्यायडोंगरी येथील संजय गणेश न्यायडोंगरी येथील संजय गायकवाड दारू पिऊन पत्नी उषा व मुलास नेहमी मारहाण करीत असे. गुरुवारी (दि.५) रात्री संजय नेहमीप्रमाणे दारू पिऊन घरी आला. त्यावेळी उषा व त्याच्यात जोरदार भांडण झाले. संजयने उषाला बेदम मारहाण करण्यास सुरुवात केली. पतीचा नेहमीचाच त्रास असलेल्या उषा हिने संतापाच्या भरात संजयच्या डोळ्यात मिरचीची पूड टाकली. त्यानंतर मुलाच्या मदतीने नायलॉनच्या दोरीने संजयचा गळा आवळला. या प्रकारात संजय जागीच गतप्राण झाला.
संजय यांची आई मीराबाई यांनी घडलेला प्रसंग पोलिसांना सांगितला. घटनेची माहिती मिळताच पोलीस निरीक्षक प्रीतम चौधरी, पोलीस उपनिरीक्षक मनोज वाघमारे आदींसह पोलीस पथकाने घटनास्थळी दाखल होत संशयित उषा गायकवाडसह तिच्या अल्पवयीन मुलास ताब्यात घेतले. मीराबाई यांनी दिलेल्या फिर्यादीनुसार, नांदगाव पोलीस ठाण्यात खुनाचा गुन्हा दाखल करण्यात आला आहे. अल्पवयीन मुलाची बाल सुधारगृहात रवानगी करण्यात आली आहे. दरम्यान, मयत संजय गायकवाड याच्या न्यायडोंगरी येथे शोकाकुल वातावरणात अंत्यसंस्कार करण्यात आले. मयत संजय यांच्या पश्चात पत्नी, आई, मुलगा, मुलगी असा परिवार आहे.
