मुंबई (वृत्तसंस्था) महापरिनिर्वाण दिनी चैत्यभूमीवरुन थेट प्रक्षेपण केलं जाईल. मात्र, कोरोनाचा प्रादुर्भाव लक्षात घेता अनुयायांना प्रवेश दिला जाणार नसल्याची माहिती सामाजिक न्यायमंत्री धनंजय मुंडे यांनी दिली आहे. धनंजय मुंडे यांनी आज चैत्यभूमीवर जात बाबासाहेब आंबेडकर यांच्या प्रतिमेला अभिवादन केले. त्यावेळी महापालिका आणि चैत्यभूमी सदस्यांशी चर्चा केली.
अयोध्येतील राम मंदिराच्या भूमीपुजनाचं प्रक्षेपण ज्याप्रमाणे करण्यात आले. त्यानुसारच 6 डिसेंबरला चैत्यभूमीवर महापरिनिर्वाण दिनाचं प्रक्षेपण केलं जाणार आहे. त्यावेळी देशभरातील नागरिक घरी बसून चैत्यभूमीचं दर्शन घेणार आहेत. त्यामुळे या चित्रिकरणाचा दर्जा उत्कृष्ट ठेवण्याचे आदेश सामाजिक न्याय विभागाकडून देण्यात आले आहेत. डॉ. बाबासाहेब आंबेडकर यांच्या महापरिनिर्वाण दिनी चैत्यभूमीवर अनेक लोक बाबासाहेबांना अभिवादन करण्यासाठी येत असतात. एवढेच नव्हे तर महापरिनिर्वाण दिनी चैत्यभूमीवर अनेक कार्यक्रमही पार पडत असतात. पण यंदा कोरोनाच्या पार्श्वभूमीवर चैत्यभूमीवर गर्दी करु नका, असे आवाहन सामाजिक न्यायमंत्री धनंजय मुंडे यांनी केले आहे. महापरिनिर्वाण दिनी चैत्यभूमीवरुन थेट प्रक्षेपण केलं जाईल. मात्र, कोरोनाचा प्रादुर्भाव लक्षात घेता अनुयायांना प्रवेश दिला जाणार नसल्याची माहिती धनंजय मुंडे यांनी दिली आहे. राज्यातील काही अनुयायी आले तर त्यांना चैत्यभूमीवर जाता येणार नाही. अशोकस्तंभाजवळ थांबून त्यांना दर्शन घ्यावं लागेल, असंही मुंडे यांनी सांगितलं. महापालिका आणि पोलिस यांना योग्य ती खबरदारी घेण्याचे आदेशही मुंडे यांनी दिले आहेत.
