जळगाव (वृत्तसंस्था) येथील सिंधी कॉलनी भागातील एका घराच्या दरवाजाचा कडीकोंडा व कुलूप तोडून चोरटयांनी सोने चांदीचे दागिने व रोख रक्कमेची चोरी केल्याची घटना उघडकीस आली आहे. याप्रकरणी एमआयडीसी पोलीस स्टेशनला गुन्हा दाखल करण्यात आला आहे.
यासंदर्भात अधिक असे की, बळीराम पेठेत रेडीमेड कपड्याचे दुकान चालवणारे हरीष खियलदास रावलानी यांच्या सिंधी कॉलनी येथील जुन्या घरात हा चोरीचा प्रकार घडला आहे. हरीष रावलानी सध्या गणपती नगर भागातील अपार्टमेंट मध्ये राहण्यास गेले आहे. १० जानेवारी रोजी सामान स्थलांतरीत करत असतांना रात्र झाल्यामुळे उर्वरित सामान त्यांनी सिंधी कॉलनी भागातील जुन्या घरातच राहू दिला. जुन्या घराला कुलूप लावून ते परिवारासह गणपती नगरातील नव्या घरी गेले होते. त्यानंतर १५ जानेवारीच्या सकाळी साडे आठ वाजता रावलानी यांनी सिंधी कॉलनी भागातील जुने घर गाठले असता चोरीची घटना उघडकीस आली. त्यांना घराच्या दरवाजाचा कडीकोंडा व कुलूप तुटलेले तसेच आतील सामान अस्ताव्यस्त आढळून आले. पाहणीअंती पन्नास हजार रुपये किंमतीची २० ग्रॅम वजनाची सोन्याची गळयातील चैन, एक हजार रुपये किमतीचे पायातील चांदीचे पायल, पाचशे रुपये किमतीची चांदीची अंगठी, रोख तीन हजार रुपये व आधार कार्ड चोरी झाल्याचे आढळले. याप्रकरणी एमआयडीसी पोलीस स्टेशनला गुन्हा दाखल करण्यात आला आहे. पुढील तपास सहायक फौजदार अतुल वंजारी व योगेश बारी करत आहेत.
