जळगाव (प्रतिनिधी) कॉंग्रेसचे माजी खासदार डॉ.उल्हास पाटील व त्यांच्या कन्या डॉ.केतकी पाटील यांचा 24 जानेवारी रोजी हा प्रवेश सोहळा होणार असल्याची चर्चा आहे. विशेष म्हणजे तीन दिवसापूर्वी उपमुख्यमंत्री देवेंद्र फडणवीस यांच्यासोबत डॉ. उल्हास पाटील सविस्तर चर्चा झाल्याचे देखील कळते.
डॉ.केतकी पाटील या रावेर लोकसभेसाठी इच्छूक उमेदवार असल्याने प्रवेश सोहळ्याला विशेष महत्व प्राप्त झाले आहे. याआधी फक्त केतकी पाटील यांच्या भाजप प्रवेशाची चर्चा होती. मात्र, तीन दिवसापूर्वी माजी खासदार डॉ.उल्हास पाटील यांनी संघाच्या ज्येष्ठ पदाधिकाऱ्याची भेट घेतल्यानंतर थेट उपमुख्यमंत्री देवेंद्र फडणवीस यांच्यासोबत त्यांची फोनवरून चर्चा घडवून आणण्यात आल्याचे कळतेय. दरम्यान, यावेळी प्राथमिक चर्चा झाली.
मात्र, उमेदवारी बाबत कोणतेही थेट आश्वासन मिळाले नसले तरी, लवकरच या बाबतही चित्र स्पष्ट होणार असल्याची माहिती सूत्रांनी दिली आहे. तर दोघांच्या प्रवेशाबाबत कोणतीही अडचण नसल्यामुळे उपमुख्यमंत्री देवेंद्र फडणवीस यांनी प्रवेशास ग्रीन सिग्नल दिला. यामुळेच माजी खासदार डॉ. उल्हास पाटील आणि त्यांच्या कन्या डॉ.केतकी पाटील या भाजपमध्ये बुधवार, 24 रोजी प्रवेश करतील, असेही कळते.
दरम्यान, हा प्रवेश सोहळा मुंबईत उपमुख्यमंत्री देवेंद्र फडणवीस, भाजप प्रदेशाध्यक्ष चंद्रशेखर बावनकुळे आणि मंत्री गिरीश महाजन यांच्या उपस्थितीत हा प्रवेश सोहळा होत असल्याची जोरदार चर्चा आहे. तर यानिमित्ताने विद्यमान खासदार रक्षाताई खडसेंचे तिकीट कापले जाणार असल्याची राजकीय वर्तुळात चर्चा सुरु झाली आहे. एकंदरीत सुरु असलेल्या राजकीय घडामोडी बघता रक्षा खडसेंना उमेदवारी मिळण्याची शक्यता धुसर झाल्याची चर्चा राजकीय वर्तुळात सुरू झाली आहे.
