धुळे (प्रतिनिधी) शिरपूर तालुक्यातील जामन्यापाडा येथील ग्रामपंचायत कार्यालयात तक्रारदाराकडून त्याच्या आत्याच्या जन्माची दफ्तरी नोंद करण्यासाठी १४०० रुपयांची लाच स्वीकारताना ग्रामसेवक गुलाब रामदास चौधरी (वय ५२) याला धुळे लाचलुचपत विभागाच्या पथकाने रंगेहात अटक केली आहे.
जामण्यापाडा येथील रहिवाशाच्या तक्रारीनुसार त्यांच्या आत्याचा जन्म १ मे १९६८ मध्ये जामण्यापाडा येथे झाला होता. आजोबा अशिक्षित असल्याने जन्माची नोंद केली नव्हती. त्यामुळे जन्माची नोंद करण्यासाठी तक्रारदाराने शिरपूर न्यायालयात अर्ज दाखल केला होता. अर्जावर सुनावणी होऊन न्यायालयाने तक्रारदाराच्या आत्याच्या जन्माची नोंद करावी, असे निर्देश १४ ऑक्टोबर २०२२ मध्ये दिले होते. त्यानुसार तक्रारदाराने जन्माची नोंद करण्यासाठी १६ मे रोजी न्यायालयाच्या आदेशासह जामन्यापाडा येथील तक्रारदाराच्या आत्याच्या जन्माची दफ्तरी नोंद करण्यासाठी ग्रामसेवक गुलाब रामदास चौधरी यांच्याकडे अर्ज केला. चौधरी यांनी नोंद करण्यासाठी १४०० रुपयांची मागणी केली. तेव्हा त्या तक्रारदाराने यासंदर्भात धुळे लाचलुचपत प्रतिबंधक विभागाकडे तक्रार केली. त्याची पडताळणी करण्यात आली. त्यानुसार सोमवारी दुपारी ग्रामपंचायत कार्यालयात सापळा रचून जन्माची नोंद करण्यासाठी लेट फीच्या नावाखाली पंचसाक्षीदारा समक्ष तक्रारदाराकडून लाच स्वीकारताना ग्रामसेवकास रंगेहात पकडण्यात आले.
यावेळी ग्रामसेवक चौधरी यांना अटक करताना त्यांनी प्रतिकार केला. तेव्हा त्यांना सापळा पथकाने योग्य बळाचा वापर करून अटक केली. ही कारवाई पोलिस उपअधीक्षक अभिषेक पाटील यांच्या मार्गदर्शनाखाली पोलिस निरीक्षक प्रकाश झोडगे, मंजितसिंग चव्हाण, राजन कदम, शरद काटके, भूषण खलाणेकर, भूषण शेटे, संतोष पावरा, रामदास बारेला, गायत्री पाटील, मकरंद पाटील, प्रवीण पाटील, प्रशांत बागुल, रोहिणी पवार, वनश्री बोरसे, सुधीर मोरे आणि जगदीश बडगुजर यांनी केली आहे.
