मुंबई (प्रतिनिधी) – केंद्र शासनाच्या विविध मंत्रालयांसोबत निकट समन्वयाने कार्यरत असलेल्या तसेच भारत–आंतरराष्ट्रीय व्यापार, गुंतवणूक आणि औद्योगिक सहकार्यासाठी कार्य करणाऱ्या इंडो-आफ्रिकन चेंबर ऑफ कॉमर्स अँड इंडस्ट्री (IACCI), मुंबई या प्रतिष्ठित संस्थेच्या आंतरराष्ट्रीय व्यापार प्रोत्साहन समितीवर (International Trade Promotion Committee) निर्मल सुधाकर नेमाडे यांची मानद समिती सदस्य म्हणून निवड करण्यात आली आहे. त्यांची ही नियुक्ती १ सप्टेंबर २०२६ पासून तीन वर्षांच्या कालावधीसाठी राहणार आहे.
जळगाव जिल्ह्यातील धरणगाव तालुक्यातील नांदेड तसेच अमळनेर तालुक्यातील कळमसरे येथून आपल्या प्रवासाची सुरुवात करून स्वतःच्या कर्तृत्व, कौशल्य आणि आंतरराष्ट्रीय अनुभवाच्या जोरावर एका प्रतिष्ठित आंतरराष्ट्रीय संस्थेच्या उच्चस्तरीय समितीवर मानद सदस्य म्हणून स्थान मिळवणे, हा निर्मल नेमाडे यांचा प्रवास ग्रामीण भागातील तरुण आणि नवउद्योजकांसाठी प्रेरणादायी ठरला आहे.
निर्मल नेमाडे यांनी ‘इंटरनॅशनल बिझनेस अँड इंटरनॅशनल रिलेशन्स’ (International Business & International Relations) या विषयात उच्च शिक्षण घेतले आहे. कारकिर्दीच्या सुरुवातीला त्यांनी जेएनपीटी (JNPT) बंदरावर एका नामांकित इटालियन कंपनीत महत्त्वाची जबाबदारी सांभाळली. सध्या त्यांची संस्था केंद्र व राज्य शासनाच्या विविध महत्त्वाकांक्षी प्रकल्पांसाठी तांत्रिक आणि धोरणात्मक सल्लागार म्हणून कार्यरत आहे.
आंतरराष्ट्रीय व्यापार, लॉजिस्टिक्स आणि राजनैतिक संबंधांचा सखोल अभ्यास असण्यासोबतच आशिया, युरोप आणि आफ्रिका खंडातील अनेक देशांना भेटी देऊन तेथील बाजारपेठांचा प्रत्यक्ष अनुभव त्यांनी घेतला आहे. विविध देशांमधील व्यापार पद्धती, गुंतवणुकीच्या संधी आणि औद्योगिक क्षेत्राचा जवळून अभ्यास हा त्यांच्या कार्याचा महत्त्वाचा भाग आहे. भारत आणि आफ्रिकेतील द्विपक्षीय व्यापार संबंध अधिक दृढ करण्यासाठी असलेली त्यांची बांधिलकी आणि व्यापक आंतरराष्ट्रीय अनुभव लक्षात घेऊन चेंबरने त्यांची या समितीवर निवड केली आहे.
या समितीच्या माध्यमातून भारतीय आणि आफ्रिकन उद्योगांमधील नवीन व्यापारी संधींचा शोध घेणे, बी-टू-बी (B2B) बैठका आयोजित करणे, व्यापार शिष्टमंडळे (Trade Missions) घडवून आणणे तसेच परदेशी दूतावास, उच्चायुक्तालये आणि विविध शासकीय संस्थांशी समन्वय साधून थेट परकीय गुंतवणूक वाढविण्यासाठी ते सक्रिय योगदान देणार आहेत.
चेंबरच्या सरचिटणीसांनी नियुक्तीपत्रात नेमाडे यांच्या व्यावसायिक अनुभवाचे, जागतिक भ्रमंतीतून मिळालेल्या आंतरराष्ट्रीय दृष्टिकोनाचे आणि भारत–आफ्रिका व्यापारी संबंध बळकट करण्यासाठी असलेल्या बांधिलकीचे कौतुक केले आहे. त्यांच्या अनुभवाचा संस्थेच्या उद्दिष्टांना गती देण्यासाठी मोठा फायदा होईल, असा विश्वासही व्यक्त करण्यात आला आहे.
जळगावच्या ग्रामीण भागातून आपल्या कारकिर्दीची सुरुवात करून आंतरराष्ट्रीय उद्योग आणि व्यापार क्षेत्रातील प्रतिष्ठित मंचावर मिळवलेले हे यश उल्लेखनीय मानले जात आहे. त्यांच्या या निवडीबद्दल विविध उद्योग संघटना, व्यावसायिक मंडळे आणि सामाजिक क्षेत्रातून कौतुक व अभिनंदनाचा वर्षाव होत आहे.
