मुंबई (वृत्तसंस्था) ग्लोबल बाजारातून मिळालेल्या संकेतांनंतर (Global Cues) भारतात सोन्याच्या दरात (Gold Prices) वाढ झाली. मल्टी कमॉडिटी एक्स्चेंज ऑफ इंडियावर (MCX) सोन्याच्या दरांमध्ये 0.09 टक्क्यांची वाढ झाली. त्यामुळे 10 ग्रॅम सोन्याचा दर 50 हजार 590 रुपये झाला आहे.
दरम्यान, चांदीच्या (Silver Prices) किमतीमध्ये मात्र घसरण झाली आहे. दरामध्ये 0.08 टक्क्यांची घसरण झाल्यानं चांदी प्रतिकिलो 61 हजार 515 रुपयांना मिळत आहे. डॉलर दोन दशकांतील उच्चांकी स्थितीमध्ये होता. त्यामध्ये घसरण झाल्यानं आंतरराष्ट्रीय बाजारात शुक्रवारी सोन्याच्या किमतीत वाढ झाली. रॉयटर्सच्या वृत्तानुसार, स्पॉट गोल्ड फ्युचर्स 0.2 टक्क्यांनी घसरून प्रति औंस 1 हजार 838.81 डॉलर्सवर आले तर यूएस गोल्ड फ्युचर्स 0.1 टक्क्यांनी घसरून 1 हजार 839.30 वर आले आहेत. जागतिक बाजारपेठेमध्ये या आठवड्यात सोन्याच्या किमतींमध्ये सुमारे 1.5 टक्क्यांची वाढ झाली आहे.
दोन दशकांच्या उच्चांकावर असलेल्या यूएस डॉलरची किंमत काहीशी घसरली आहे. जेव्हा डॉलरच्या किमतीमध्ये घसरण होते तेव्हा इतर चलन धारकांसाठी सोनं खरेदी करणं अधिक स्वस्त होतं. 10 वर्षांच्या यूएस ट्रेझरी उत्पन्नातही घसरण झाली आहे. त्यामुळे सोन्याची मागणी वाढली आहे. एसपीडीआर गोल्ड ईटीएफ हा सोन्याचा जगातील सर्वांत मोठा एक्सचेंज-ट्रेडेड फंड आहे. या फंडामध्ये गुरुवारी 0.66 टक्क्यांची वाढ होऊन तो 1 हजार 056.18 प्रतिटनांवर गेला. बुधवारी ही किंमत 1 हजार 049.21 प्रतिटन इतकी होती.
