चोपडा (प्रतिनिधी) संत सावतामाळी युवक संघ महाराष्ट्र राज्य चोपडा शहर व तालुका कार्यकारणीच्या वतीने नीट परीक्षेत यश मिळवलेल्या विद्यार्थ्यांचा नुकताच सत्कार करण्यात आला. तसेच सोशल डिस्टंसिंगचे पालन करत वेले येथील अमर संस्था संचालित मनोरुग्ण सेवाश्रम मानव सेवा या ठिकाणी तेथील प्रभुजी म्हणजेच मनोरुग्णांना मास्कचे वाटप करण्यात आले.
तालुक्यातील ग्रामीण भागातील विद्यार्थी हे बारावी परीक्षेनंतर नीट परीक्षेच्या तयारीसाठी कोटा,नांदेड अशा मोठ्या शहरांमध्ये जाऊन महागडे क्लासेस लावतात. मात्र परिस्थितीची जाणीव ठेवत चोपडा ग्रामीण भागातील अनेक विद्यार्थ्यांनी स्थानिक शिक्षकांचे मार्गदर्शन घेऊन इथेच राहून नीट परीक्षेत घवघवीत यश मिळविले आहे. त्यांच्या या कामगिरीची दखल घेत संत सावतामाळी युवक संघ महाराष्ट्र राज्य चोपडा शहर व तालुका कार्यकारणी च्या वतीने वैद्यकीय क्षेत्रात जाणाऱ्या या विद्यार्थ्यांच्या हस्ते सध्याच्या कोरोनाच्या भयावह परिस्थितीने जगभर उच्छाद मांडलेल्या स्थितीत सोशल डिस्टंसिंगचे पालन करत वेले येथील अमर संस्था संचालित मनोरुग्ण सेवाश्रम मानव सेवा या ठिकाणी तेथील प्रभुजी म्हणजेच मनोरुग्णांना मास्कचे वाटप करण्यात आले.
युवक संघाच्या वतीने या यशाचे शिखर संपादन करणाऱ्या विद्यार्थ्यांचा छोटेखानी सत्कार करण्यात आला. यावेळी विद्यार्थ्यांना व त्यांच्या पालकांना कार्यक्रमाच्या प्रसंगी मेडल व सन्मानपत्र देऊन सन्मानित करण्यात आले. या कार्यक्रमाला अध्यक्षस्थानी लासुर येथील माळी समाजाचे नेते व माजी उपसरपंच ए.के. गंभीर तर प्रमुख पाहुणे म्हणून चोपडा शहर पोलिस स्टेशनचे पोलीस निरीक्षक संजयजी ठेंगे हे उपस्थित होते. तर विद्यार्थ्यांना मार्गदर्शनासाठी मार्गदर्शक म्हणून धरणगाव येथील प्रसिद्ध एमएस डॉ. देवकीनंदन वाघ यांची उपस्थिती लाभली. यावेळी कार्यक्रमाच्या सुरुवातीला विद्यार्थ्यांच्या हस्ते मास्क वाटप केले गेले. नंतर युवक संघाच्या वतीने मेडल व सन्मानपत्र देऊन विद्यार्थ्यांचा व त्यांच्या पालकांचा सत्कार करण्यात आला.
प्रिवेंशन म्हणजेच एखाद आजार होण्यापूर्वी घेतलेली काळजी. ती पोलिस खाते कशा पद्धतीने समाजात एखादा गुन्हा घडू नये यापूर्वी घेत असते, या अनुषंगाने वैद्यकीय क्षेत्र व पोलिस क्षेत्राची सांगड घालत शहर पोलिस स्टेशनचे पोलीस निरीक्षक संजयजी ठेंगे यांनी यावेळी विद्यार्थ्यांना मार्गदर्शन केले. तर प्रसिद्ध एम.एस. डॉ. देवकीनंदन वाघ यांनी वैद्यकीय क्षेत्राशी निगडित बाबींवर विद्यार्थ्यांना मार्गदर्शन केले. अध्यक्ष भाषणांमध्ये ए.के.गंभीर यांनी विद्यार्थ्यांना त्यांच्या पालकांच्या परिस्थितीविषयी जाणीव करून दिली. या छोटेखानी कार्यक्रमाला संत सावतामाळी युवक संघाचे प्रदेशाध्यक्ष जितेंद्र महाजन, युवक संघाचे विभागीय उपाध्यक्ष लक्ष्मण माळी, विभागीय संपर्कप्रमुख समाधान माळी, जिल्हाध्यक्ष महेंद्र माळी, जिल्हा उपाध्यक्ष अल्केश माळी, शहर उपाध्यक्ष विठ्ठल माळी यांनी उपस्थिती देऊन सदर कार्यक्रमासाठी परिश्रम घेतले. या कार्यक्रमाला विद्यार्थ्यांना मार्गदर्शन करणारे वाघजाळे , वाघजाळे मॅडम, वाय.डी.पाटील, सागर धनगर व भरत महाजन यांची देखील उपस्थिती होती. सदर कार्यक्रम वेळी अमर संस्थेच्या वतीने आजच्या कोविड-१९ परिस्थितीत मनोरुग्णाची प्रामाणिकपणे मनापासून सेवा केली जात आहे. त्यामुळे अमर संस्थेचे संस्थापक अध्यक्ष अण्णासाहेब चंद्रकांत गुलाबराव पाटील व मानव सेवेचे व्यवस्थापक एन.आर. पाटील यांना कोरणा योद्धा सन्मानपत्र देऊन गौरविण्यात आले. या कार्यक्रमाचे प्रास्ताविक प्रदेशाध्यक्ष जितेंद्र महाजन यांनी तर सूत्रसंचालन व आभार प्रदर्शन शहर कार्याध्यक्ष नरेंद्र महाजन यांनी केले.
