धरणगाव (प्रतिनिधी) येथील शतकोत्तर पी.आर.हायस्कूलमध्ये आज महात्मा ज्योतिराव फुले यांच्या स्मृतिदिनानिमित्त त्यांच्या स्मृतीस अभिवादन करण्यात आले तर विद्यार्थ्यांनी आपल्या भाषणातून महात्मा फुले आणि सावित्रीबाई फुले यांच्या सामाजिक व शैक्षणिक कार्यकर्तृत्वाचा गौरव केला.
कार्यक्रमाच्या अध्यक्षस्थानी मुख्याध्यापक डॉ. संजीवकुमार सोनवणे हे होते. त्यांच्या हस्ते महात्मा फुले यांच्या प्रतिमेचे पूजन करण्यात आले. पर्यवेक्षक कैलास वाघ, ज्येष्ठ शिक्षक यू.एस.बोरसे, व्ही.एच.चौधरी, एनसीसी मेजर डी.एस.पाटील, डॉ. वैशाली गालापुरे, श्रीमती सुरेखा तावडे आणि शिक्षक, शिक्षकेतर कर्मचाऱ्यांनी अभिवादन केले. डॉ. बी.डी.शिरसाठ यांनी फुले दाम्पत्याने केलेल्या सामाजिक आणि शैक्षणिक कार्याचा आढावा घेऊन विद्यार्थ्यांनी त्यांच्या विचारांचा अंगिकार करून समाजप्रबोधनाचे वाटेकरी व्हावे, असे आवाहन केले. मुख्याध्यापक डॉ.सोनवणे यांनी या महापुरुषांच्या विचार प्रेरणादायी असून सर्वांनी त्यांचे ऋणाईत राहिले पाहिजे, असे मत व्यक्त केले. याप्रसंगी किंजल परदेशी, नेहा बत्तीसे, यश पगारीया, खूश पवार या विद्यार्थ्यांची भाषणं झाली. कार्यक्रमाच्या यशस्वीतेसाठी योगेश नाईक, मिलिंद हिंगोणेकर व जितेंद्र दाभाडे यांनी सहकार्य केले.
