जळगाव (प्रतिनिधी) राष्ट्रवादी काँग्रेसचे नेते एकनाथराव खडसे यांनी पालकमंत्री गुलाबराव पाटील यांच्याविरुद्ध अब्रूनुकसानीचा दावा दाखल केलेला आहे. या प्रकरणात ना. पाटील यांना जळगाव जिल्हा न्यायालयाने ५०० रुपयांचा दंड केला आहे.
युती सरकारमध्ये एकनाथराव खडसे बारा खात्यांचे मंत्री असताना गुलाबराव पाटील यांनी त्यांच्यावर मंत्रिपदाचा गैरवापर करून सरकारकडून लाखो रुपयांचे अनुदान लाटण्याचा आरोप केला होता. या आरोपासंदर्भात खडसे यांनी 2016 मध्ये गुलाबराव पाटील यांच्या विरोधात जळगाव जिल्हा सत्र न्यायालयात पाच कोटी रुपयांचा अब्रू नुकसानीचा दावा दाखल केला होता. या खटल्यात सुनावणी जळगाव जिल्हा न्यायालयात सुरु आहे.
पहिल्याच दिवशी मंत्री गुलाबराव पाटील गैरहजर होते. ना. पाटील यांनी आपल्या वकिलामार्फत सुनावणीला गैरहजर राहण्याची परवानगी मिळावी, म्हणून अर्ज दाखल केला होता. कोर्टाने 500 रुपयांचा दंड करत गुलाबरावांचा अर्ज मंजूर केला. तसेच रजेचा अर्ज मंजूर करताना, उद्याचा सुनावणीचा दिवस सोडून पुढची तारीख मिळणार नाही, असेही स्पष्ट केले. याबाबतची माहिती खडसे यांचे वकील भूषण देव यांनी माध्यमांना दिली आहे.
