धरणगाव (प्रतिनिधी) येथील गुड शेपर्ड इंग्लिश मिडियम स्कुलमध्ये ५ वी ते ८ वीच्या विद्यार्थ्यांचे गुलाबपुष्प देऊन स्वागत करण्यात आले. कोरोनाच्या प्रदीर्घ कालावधीनंतर शाळेत आलेले विद्यार्थी सत्काराने भारावले.
याबाबत सविस्तर वृत्त असे की, कोरोना महामारीमुळे शाळा बऱ्याच कालावधी पासून बंद होत्या. आज २७ जानेवारी २०२१ पासून इयत्ता ५ वी ते ८ वी चे वर्ग कोरोनाच्या शासकीय नियमावलीचे पालन करून सुरू करण्यात आले. थर्मल स्क्रिनिंग, ऑक्सिमीटर, सॅनिटाईझर, फिजिकल डिस्टनसिंगच्या नियमांचे पालन करून व पूर्ण काळजी घेऊन शाळेचा पहिला दिवस उत्साहात पार पडला.
पहिल्या दिवशी शाळेत आलेल्या विद्यार्थांची मरगळ झटकली जावी आणि विद्यार्थ्यांचा उत्साह वाढवा, या उद्देशाने प्रत्येक वर्गातील २ मुले व २ मुली यांचा प्रातिनिधिक स्वरूपात गुलाबपुष्प देऊन सत्कार करण्यात आला. शाळेच्या प्राचार्या चैताली रावतोळे व शाखा व्यवस्थापक जगन गावित यांनी विद्यार्थी – विद्यार्थिनींच्या हस्ते सत्कार सोहळा संपन्न झाला. सहशिक्षक लक्ष्मण पाटील यांनी सर्व विद्यार्थ्यांचे शब्दसुमनांनी स्वागत केले. तसेच शाळा सुरू झाल्याबद्दल शुभेच्छा दिल्या. सहशिक्षक अमोल सोनार यांनी कोरोना संदर्भातील शासकीय नियमांचे काटेकोर पालन करावे असे आवाहन केले. याप्रसंगी शाळेच्या प्राचार्या चैताली रावतोळे, शाखा व्यवस्थापक जगन गावित, शिक्षिका भारती तिवारी, अनुराधा भावे, शिरीन खाटीक, दामिनी पगारिया, ग्रीष्मा पाटील, पुष्पलता भदाणे, गायत्री सोनवणे, पूनम कासार, सपना पाटील, नाजनिन शेख, शिक्षक लक्ष्मण पाटील, अमोल सोनार, सागर गायकवाड यांच्यासह सरला पाटील, शितल सोनवणे, इंद्रशिंग पावरा, अमोल देशमुख हे शिक्षकेतर कर्मचारी आणि ५ वी ते ८ वी चे विद्यार्थी – विद्यार्थिनी उपस्थित होते.
