धरणगाव (प्रतिनिधी) – गणपती दर्शनासाठी चोपडाकडे जाणाऱ्या धरणगाव येथील दाम्पत्याच्या दुचाकीला रोटवद गावाजवळ पाठीमागून भरधाव दुचाकीने धडक दिली. अपघातानंतर जखमींना मदत करण्याऐवजी मद्यधुंद अवस्थेतील वाद टोळक्याने पती-पत्नीसह सोडवण्यासाठी आलेल्या मध्यस्थांनाही बेदम मारहाण केली. महिलेचे सोन्याचे मंगळसूत्र हिसकावून नेण्यासह मदतीसाठी आलेल्या चारचाकी वाहनावर दगडफेक करून काच फोडण्यात आली. या प्रकरणी एरंडोल येथील संशयितांसह इतरांविरुद्ध गुन्हा दाखल करण्यात आला आहे.
धरणगाव येथील संजय नगरातील अंजली शांताराम पाटील या पती शांताराम हिंमत पाटील व मुलगी आरू यांच्यासह दुचाकी क्रमांक एमएच-१९-ईएफ ४३१७ ने चोपड्याकडे जात होते. त्यांच्यासोबत भाचे पवन पाटील व प्रदीप पाटील हे दुसऱ्या दुचाकीने होते. रोटवद गावाजवळ सिमेंट रस्ता संपून कच्चा रस्ता सुरू होतो, त्या ठिकाणी दुचाकी क्रमांक एमएच-१९-ईजे-०८३८ वरील दोघांनी त्यांच्या दुचाकीला पाठीमागून जोरदार धडक दिली. यात दांपत्य व त्यांची मुलगी रस्त्यावर फेकले गेले होते
धरणगाव पोलिसात संशयितांवर गुन्हा दाखल
जखमींना धरणगाव ग्रामीण रुग्णालयात दाखल करण्यात आले. शांताराम पाटील यांची प्रकृती गंभीर असल्याने त्यांना पुढील उपचारासाठी जळगाव येथे हलवण्यात आले. अंजली पाटील यांच्या फिर्यादीवरून जीवन पिंटू बोरसे, शुभम सुभाष मराठे, सागर धनगर, आनंद भील, चिनू भील, जीवन पांडू भील (सर्व रा. एरंडोल) यांच्यासह अन्य १० ते १५ जणांविरुद्ध तक्रार दाखल करण्यात आली आहे.
जखमींना दवाखान्यात नेण्यास सांगत असताना दुचाकीवरील दोघांसह त्यांच्या साथीदारांनी मारहाण सुरू केली. चुलत भाचा भूषण पाटील व भाचा पवन पाटील यांना मारहाण होत असताना रोटवद ग्रामस्थांनी मध्यस्थी केली. मात्र, पवन नेरकर, जितेंद्र पाटील, सचिन कोळी व जितेंद्र पाटील यांनाही मारहाण करण्यात आल्याचे तक्रारीत नमूद आहे. अंजली पाटील यांना मारहाण करून त्यांच्या गळ्यातील सोन्याचे मंगळसूत्र हिसकावून नेल्याचा आरोप आहे. मदतीसाठी सतीश मराठे चारचाकी क्रमांक एमएच-१९-ईजी-६७८१ ने आले असता वाहनावर दगडफेक करून मागील काच फोडण्यात आली.
