जळगाव (प्रतिनिधी) – वीजचोरीला आळा घालण्यासह वीज वितरण यंत्रणेवरील अनधिकृत वीजभार कमी करण्यासाठी महावितरणकडून विशेष मोहीम राबविण्यात येत आहे. या मोहिमेंतर्गत खेडी खुर्द आणि तुरखेडा गाव शिवारात शेतीपंपांसाठी अनधिकृतपणे टाकण्यात आलेले वीज आकडे काढून टाकण्याची धडक कारवाई करण्यात आली. या कारवाईत खेडी खुर्द येथे १२ अँपिअर, तर तुरखेडा शिवारात तब्बल ४५ एच.पी. इतका अनधिकृत वीजभार कमी करण्यात महावितरणला यश आले.
कार्यकारी अभियंता दत्तात्रय साळी, उपकार्यकारी अभियंता विजय कापुरे यांच्या मार्गदर्शनाखाली खेडी खुर्द येथे कानळदा कक्षाचे कनिष्ठ अभियंता इम्तियाज अली यांनी ही मोहीम राबविली. या वेळी वीजचोरीसाठी अनधिकृतपणे वापरण्यात येणारे वीज आकडे शोधून ते काढण्यात आले. या कारवाईमुळे वीज वितरण यंत्रणेवरील १२ अँपिअर इतका अतिरिक्त भार कमी झाला. कनिष्ठ अभियंता दिनेश पाटील यांनी तुरखेडा गाव शिवारात विदगाव गावठाण वीजवाहिनीवरून शेतीपंपांसाठी घेण्यात आलेल्या अनधिकृत वीजजोडण्यांविरोधात कारवाई केली. या मोहिमेत अनधिकृत वीज आकडे काढून टाकण्यात आले. परिणामी, तब्बल ४५ एच.पी. इतका अनधिकृत वीजभार कमी करण्यात आला.
अनधिकृत वीजजोडण्यांमुळे वीज वितरण यंत्रणेवर अतिरिक्त ताण येतो. तसेच तांत्रिक व व्यावसायिक वीजहानीत वाढ होण्याची शक्यता असते. अशा प्रकारच्या कारवायांमुळे वीजहानी रोखण्यासह वितरण यंत्रणेची कार्यक्षमता टिकवून ठेवण्यास मदत होते. त्याचबरोबर प्रामाणिक वीज ग्राहकांना दर्जेदार आणि सुरळीत वीजपुरवठा मिळण्यास हातभार लागतो.
वीजचोरी आणि अनधिकृत वीजवापर रोखण्यासाठी महावितरणची विशेष मोहीम यापुढेही सातत्याने सुरू राहणार असून, वीज वितरण यंत्रणेचा सुरक्षित व कार्यक्षम वापर करण्याचे आवाहन महावितरणकडून करण्यात येत आहे.
