जळगाव (प्रतिनिधी) – जळगाव ते धुळे महामार्गावरील विद्यापीठ परिसरासमोर असलेल्या हॉटेलच्या मागील बाजूस असलेल्या दुमजली इमारतीमध्ये सुरु असलेल्या पत्त्याच्या क्लबमध्ये गोळीबार झाल्याचे समजताच पोलिसांनी रात्री घटनास्थळी धाव घेतली. गोळीबार झाल्याची खातरजमा करण्याकरीता मंगळवारी पुन्हा पोलीस घटनास्थळी गेले. मात्र त्यांना घटनास्थळी काहीही मिळून आले नाही.
जळगाव ते पाळधी दरम्यान विद्यापीठाच्या विरुद्ध दिशेला असलेल्या एका हॉटेलमागे असलेल्या दुमजली इमारतीमध्ये पोलिस प्रशिक्षणाची तयारी करणारे विद्यार्थी राहतात. त्याच इमारतीच्या वरच्या मजल्यावर पत्र्याचे शेड आणि हिरव्या रंगाचे पडदा लावून पत्त्यांचा क्लब सुरु होता. याठिकाणी पत्ते खेळणाऱ्यासाठी आलेल्यांमध्ये वाद होवून सोमवारी रात्रीच्या सुमारास याठिकाणी जोरदार आवाज झाला आणि परिसरात गोळीबार झाल्याची चर्चा सुरु झाली. यासंदर्भात एका तरुणाने पत्र्याला दगड फेकून मारल्याचा गोळीबार झाल्या सारखा आवाज आल्याचे सांगितले होते. घटनेची माहिती मिळताच स्थानिक गुन्हे शाखेचे पोलीस निरीक्षक राहुल गायकवाड, धरणगाव पोलीस ठाण्याचे पोनि उमाकांत गायकवाड, पाळधी दूरक्षेत्र पोलीस ठाण्याचे प्रभारी सपोनि भूषण कोते हे कर्मचाऱ्यांसह घटनास्थळी दाखल झाले.
घटनास्थळी सापडला नाही पुरावा
गोळीबाराच्या घटनेची खात्री करण्यासाठी मध्यरात्री पोलीस अधिकारी व कर्मचारी घटनास्थळी थांबून होते. त्यानंतर मंगळवारी पुन्हा घटनास्थळी जावून पोलिसांनी तपासणी केली. मात्र घटनास्थळी गोळीबारानंतर आढळणाऱ्या पुंगळी कुठेही आढळल्या नाही.
पत्त्यांचा कॅट सापडल्याने चर्चाना दुजोरा
घटनास्थही काहीही न मिळून आल्यामुळे गोळीबाराची केवळ चर्चा असल्याचे पोलिसांकडून सांगण्यात आले. मात्र पोलीस भरतीचा सराव करणाऱ्या ठिकाणीच पत्त्यांचा क्लब सुरु असल्याची चर्चा जोरदार रंगली होती. गेल्या काही दिवसांपुर्वी नशिराबाद पोलीस ठाण्याच्या हद्दीत झालेल्या कारवाईनंतर हा क्लब याठिकाणी सुरु झाल्याची चर्चा सुरु होते. तसेच याठिकाणी पत्याचा एक कॅट सापडल्यामुळे हा क्लब सुरु असल्याच्या चर्चाना दुजोरा देखील मिळाला आहे.
