इंदूर (वृत्तसंस्था) आपल्या नावावर वयाच्या अवघ्या २८ व्या वर्षी चार कंपन्या, त्याचबरोबर गिनीज बुक ऑफ रेकॉर्डमध्ये नावाची नोंद असलेला आणि कोट्यवधींच्या संपत्तीचा मालक असलेल्या मुंबईच्या एका व्यावसायिक तरुणाने इंदूरमध्ये आत्महत्या करत आपले जीवन संपवल्याची दुर्दैवी घटना समोर आली आहे. या तरुणाचं नाव पंकज कांबळे असं आहे.
इंदोरच्या ‘ग्लोडी पॅलेस’ नावाच्या एका बड्या हॉटेलच्या रुममध्ये गळफास घेत पंकजनं आपलं आयुष्य संपवलं. या घटनेची इंदूरच्या कनाडिया पोलीस स्टेशनमध्ये नोंद झाली आहे. पंकजच्या रुममधून पोलिसांना दीड लाखांची रोकड आणि एक डायरी सापडली आहे. या डायरीत त्यानं ‘आय लव्ह यू नीलम’ असंही लिहिलेलं पोलिसांच्या निदर्शनास आलं. सोबतच आपल्या बँक खात्यात एक कोटी रुपये असल्याचा उल्लेखही पंकजनं डायरीत केलाय. ‘सुसाईड नोट’च्या आधारे पोलिसांनी पुढील चौकशी सुरू केली आहे. प्राथमिकदृष्ट्या प्रेमप्रकरणातून आणि तणाव हे या आत्महत्येमागची कारणं असू शकतात, असा पोलिसांचा कयास आहे. पंकजनं मृत्यूपूर्वी आपल्या कुटुंबाला अनेक मॅसेज केल्याचं पोलिसांच्या चौकशीत समोर आलं. यामध्ये त्यानं आपल्या कामाच्या तणावाबद्दल काही उल्लेख केला होता. ‘कामाच्या तणावामुळे मी मृत्यूला सामोरं जातोय. यात कुणाचाही दोष नाही’ असं त्यानं आपल्या सुसाईड नोटमध्ये म्हटलंय. संजय शुक्ला यांच्या मुलाच्या लग्नसोहळ्यासाठी पंकज कांबळे मुंबईतून इंदूरला गेला होता. या विवाहाच्या इव्हेंट मॅनेजमेंटची जबाबदारी पंकजनं स्वीकारली होती. परंतु, तब्येत अचानक बिघडल्याचं सांगत पंकज विवाहसोहळ्यातून बाहेर पडला होता. दुसऱ्या दिवशी हॉटेलच्या रुममध्ये पंकजचा मृतदेह फासावर लटकलेल्या अवस्थेत आढळला.
कुटुंबीयांच्या माहितीनुसार, पंकजनं आपल्या वडिलांच्या मृत्यूनंतर कुटुंबाची जबाबदारी आपल्या खांद्यावर घेतली होती. त्याची आई आणि लहान भाऊ नागपूरमध्ये राहतात. पोलिसांकडून पंकजच्या आत्महत्येची बातमी मिळाल्यानंतर कुटुंबीय इंदोरला दाखल झाले. देशभरात अनेक इव्हेंट त्यानं हाताळले होते. पंकज कांबळेचे अनेक व्हिडिओ सोशल मीडियावर पाहायला मिळतात.
