जामनेर (प्रतिनिधी) शहरातील वर्धमान नगरमधील एका घरात शनिवारी मध्यरात्रीच्या सुमारास दोन चोरट्यांनी चांगलाच हैदोस घातला. चोरट्यांनी एकाला पायावर लोखंडी रॉडने जबर मारहाण करत महिलेच्या अंगावरील दागिने लांबवले. या घटनेने शहराबाहेर राहणाऱ्या रहिवाशांमध्ये प्रचंड भीतीचे वातावरण पसरले आहे.
या संदर्भात अधिक असे की, शहरातील वर्धमान नगरमध्ये वसंत शंकर चव्हाण हे आपल्या परिवारासह वास्तव्यास आहेत. तोंडाला काळे रुमाल बांधलेल्या दोन चोरट्यांनी वसंत चव्हाण यांच्या घराच्या मागील दरवाजाचा कोयंडा तोडून जबरदस्तीने घरात प्रवेश केला. तर वरच्या मजल्यावरील खोलीचा व शेजाऱ्यांच्या घराच्या दरवाजाची बाहेरून कडी लावली होती. घरात प्रवेश केल्याबरोबत चोरट्यांनी वसंत चव्हाण यांच्या पाय व डोक्यावर रॉडने मारहाण करून जखमी केले. तर त्यांची पत्नी कलाबाई यांच्या गळ्यातील ६ ग्रॅम वजनाची पोत व कानातील दागिने हिसकावून पळ काढला.
दरम्यान, वसंत चव्हाण यांना रात्रीच उपचारासाठी उपजिल्हा रुग्णालयात हलविण्यात आले होते. तर पोलिसांनी तपासासाठी श्वानपथकाची मदत देखील घेतली.दुसरीकडे कलाबाई चव्हाण यांच्या फिर्यादीवरून अज्ञात चोरट्यांविरुद्ध गुन्हा दाखल करण्यात आला आहे.
