वॉश्गिंटन (वृत्तसंस्था) संपूर्ण देशात दीपावली उत्सव मोठ्या उत्साहात साजरा केला जात आहे. या पार्श्वभूमीवर अमेरिकेचे नियोजित अध्यक्ष जो बायडन यांनीही भारतीयांना दिवाळीच्या शुभेच्छा दिल्या आहेत. त्यांनी आपल्या ट्विटर अकाउन्टवरुन ट्विट करत भारतीयांना शुभेच्छा दिल्या आहेत.
“भारत देशातील करोडो नागरिक प्रकाशाचा उत्सव साजरा करत आहेत. मी आणि माझी पत्नी आपणा सर्वांना दिवाळीनिमित्त शुभेच्छा देतो.” असं त्यांनी आपल्या ट्विटमध्ये म्हटलं आहे. तसेच, त्यांनी दिवाळीनंतरचं वर्ष आशादायी, आनंदाचे आणि भरभराटीचे जावो अशी कामना करत शेवटी हिंदीमध्ये साल मुबारक म्हणत भारतीयांना शुभेच्छा दिल्या आहेत.दरम्यान, कोरोनाचे सावट असताना देशात दीपावली उत्सव साजरा होतोय. पंतप्रधान नरेंद्र मोदी तसेच विविध राज्यांतील मुख्यमंत्र्यांनी कोरोना नियमांचे पालन करत दिवाळी सण साजरा करण्याचे आवाहन केले आहे. त्यांच्या आवाहनाला प्रतिसाद देत अनेक ठिकाणी प्रदूषणुक्त आणि कोरोना प्रतिबंधक नियम पाळून दिवाळी साजरी केली जात आहे. महाराष्ट्रातही मुख्यमंत्री उद्धव ठाकरे यांनी फटाके न फोडता दिवाळी साजरी करण्याचे आवाहन केले आहे.
अमेरिकेच्या अध्यक्षपदाच्या निवडणुका नुकत्याच पार पडल्या. यावेळी डेमोक्रॅटिक पक्षाचे उमेदवार जो बायडन यांना अमेरिकी जनतेने भरभरुन मतदान केले. या निवडणुकीत जो बायडेन यांनी बहुमताचा आकडा पार करत २९० प्रतिनिधी व्होट्स मिळवले. तर त्यांचे प्रतिस्पर्धी विद्यमान राष्ट्राध्यक्ष डोनाल्ड ट्रम्प यांना २३२ प्रतिनिधी व्होट्स मिळाले. बायडेन यांच्या या यशामागे अमेरिकेत स्थायिक झालेल्या भारतीय मतदारांचा मोठा वाटा असल्याचे निवडणूक विशेषज्ञांकडून सांगितले जाते. या कारणामुळेही जो बायडेन यांनी दिवाळीनिमित्त दिलेल्या शुभेच्छांना वेगळे महत्त्व आहे.
