जळगाव (प्रतिनिधी) आंघोळ करण्यासाठी बाथरुममध्ये गेलेल्या तरुणाचा हृद्यविकाराच्या झटक्याने मृत्यू झाल्याची दुर्देवी घटना शनिवारी सकाळच्या सुमारास कांचननगर परिसरात घडली. निलेश कमलाकर सोनवणे (वय ३७) असे मयत तरुणाचे नाव आहे. दरम्यान, मृत निलेश यांच्या कुटुंबियांनी रुग्णालयात मनहेलावणारा आक्रोश केला होता.
शहरातील कांचननगर परिसरात निलेश सोनवणे हे कुटुंबियांसह वास्तव्यास होते. शहरातील एका नामांकीत कापड दुकानात काम करुन ते कुटुंबाचा उदनिर्वाह करीत होते. शनिवारी सकाळी निलेश हे नेहमी प्रमाणे अंघोळ करण्यासाठी बाथरुममध्ये गेले. अंघोळ करत असताना हृदयविकाराचा झटका आल्याने ते बाथरूममध्ये खाली पडले, त्यांना जीएमसी रुग्णालयात दाखल केले असता डॉक्टरांनी त्यांची तपासणी करून मृत घोषित केले. याप्रकरणी शनिपेठ पोलिसात अकस्मात मृत्यूची नोंद करण्यात आली आहे. मृत निलेश यांच्या पश्चात आई, पत्नी, भाऊ, मुलगा व मुलगी असा परिवार आहे.
