धरणगाव (प्रतिनिधी) कॉंग्रेसचे युवानेते चंदन पाटील हे उद्या (सोमवार) मंत्री गिरीश महाजन यांच्या उपस्थितीत भाजपात प्रवेश करणार असल्यामुळे तालुक्याच्या राजकारणात मोठी खळबळ उडाली आहे. मंत्री गिरीश महाजन यांच्या उपस्थितीत चंदन पाटील यांच्यासह शेकडो कार्यकर्ते ‘जय श्रीराम’ बोलणार आहेत.
धरणगावात कॉंग्रेसला मोठं भगदाड पडले आहे. कॉंग्रेसचे युवानेते चंदन पाटील यांनी राजकीय पटलावर एक मोठा निर्णय घेतलाय. त्यानुसार ते उद्या भाजपमध्ये प्रवेश करणार आहेत. यानिमित्ताने जळगाव ग्रामीणसह धरणगाव तालुक्याच्या राजकरणात मोठी राजकीय उलथापालथ झालीय. चंदन पाटील यांच्या भाजप प्रवेशानंतर कॉंग्रेसचे धरणगाव तालुक्यातील राजकीय अस्तित्वावर प्रश्नचिन्ह निर्माण होणार आहेत.
भाजपला धरणगावसह जळगाव ग्रामीणमध्ये मिळणार ‘मराठा’ ताकद !
चंदन पाटील यांना बहुजन समाजात मानणारा एक मोठा गट आहे. विशेष करून तरुणाईतील एक मोठा गट चंदन पाटील यांच्या निमित्ताने भाजपासोबत जुळणार आहे. चंदन पाटील यांच्या भाजप प्रवेशाच्या निमित्ताने धरणगावसह जळगाव ग्रामीणमध्ये भाजपला ‘मराठा’समाजासह बहुजन समाजाची मोठी ताकद मिळणार आहे. एवढेच नव्हे तर, चंदन पाटील यांचा भाजप प्रवेशामुळे धरणगाव पालिकेतील राजकारणावर देखील मोठे परिणाम होणार आहेत.
संघटन वाढवण्यावर भर देणार : चंदन पाटील
पंतप्रधान नरेंद्र मोदी यांच्या विकासकामांनी आपण अनेक दिवसांपासून प्रभावित झालो होतो. राष्ट्रहिताच्या दृष्टीने आपण राजकीय निर्णय घेतलाय. मंत्री गिरीशभाऊ महाजन आणि भाजप जिल्हाध्यक्ष आमदार राजूमामा भोळे यांच्या नेतृत्वावर विश्वास ठेऊन आपण भाजप प्रवेश करतोय. आपल्याला कोणतीही निवडणूक लढविण्यात रस नाहीय. त्यामुळे आपण फक्त भाजपचे संघटन वाढीवर भर देणार आहोत.
