महाड (वृत्तसंस्था) पोलादपूर तालुक्यातील कालवली जामा मशिदीत चक्क ६५ वर्षांपेक्षा अधिक काळापासून हिंदूबांधव नित्यनेमाने दरवर्षी न चुकता नमाज अदा करीत असल्याची आश्चर्यजनक परंपरा आहे. दिवाळीमध्ये लक्ष्मीपूजनाच्या दिवशी कालवली गावात हिंदू मुस्लीम ऐक्याची अनोखी परंपरा आजही ग्रामस्थांनी जपून ठेवली आहे. लक्ष्मीपूजनाला गावातील हिंदू बांधवांनी गावातील जामा मशिदीत नमाज पठण केले.
चिखलीतील बांदल यांचे कालवलीतील शिष्य गुरुवर्य सदूबाबू पार्ट तथा पार्ट बाबा आणि नानाबाबा वलिले यांच्यातील संख्यातून ही परंपरा सुरू झाल्याचे सांगितले जाते. या दोघांमध्ये सख्य कसे झाले याबाबत कोणासही काहीही माहिती नाही. मात्र, नानाबाबा वलिले यांची ही परंपरा कालवली ग्रामस्थांनी आजही कायम ठेवली आहे. कालवली हे महाडजवळ असलेले पोलादपूर तालुक्यातील गाव. गेली अनेक वर्षे या गावात सुख, शांती आणि धार्मिक ऐक्य कायम आहे. गावातील सर्वजण एकमेकांच्या सुखदुःखात सामील होताना दिसतात. या गावात गेली अनेक वर्षे लक्ष्मीपूजनाच्या दिवशी हिंदू बांधव मशिदीमध्ये येऊन नमाज अदा करतात. आजदेखील लक्ष्मीपूजनाला हिंदू बांधवांनी आपली परंपरा कायम ठेवली. नमाज अदा केल्यानंतर दिवाळीच्या निमित्ताने जमलेल्या हिंदू बांधवांना मुस्लीम बांधवांनी दिवाळी भेट देऊन आनंद व्यक्त केला. आगामी काळातही ही परंपरा पुढे सुरू ठेवण्याचा मानस आप्पा पाटे यांनी यावेळी व्यक्त केला.
