छत्रपती संभाजीनगर (वृत्तसंस्था) आईचे बोट धरून रस्ता ओलांडणाऱ्या पाच वर्षीय बालिकेला भरधाव दुचाकीने धडक दिल्याने तिचा दुर्दैवी मृत्यू झाल्याची हृदयद्रावक घटना जळगाव रोडवरील आंबेडकरनगरसमोर मंगळवारी दुपारी घडली. या अपघात अन्वी मोरे या चिमुकलीचा मृत्यू झाला तर आई शीला मोरे (वय ३१) या जखमी झाल्या आहेत.
उन्हाळी सुट्या सुरू असल्याने अन्वीला पालकांनी खासगी शिकवणी लावली होती. १६ मे रोजी दुपारी १२ वाजेच्या सुमारास नेहमी प्रमाणे आईचं बोट धरून अन्वी रस्ता ओलांडत होती. याचवेळी भरधाव येणाऱ्या स्पोर्ट्स बाईकने (एमएच १५ जेबी ८९५६) दोघींना जोरात धडक दिली. यात अन्वी जागीच बेशुद्ध झाली आणि तिची आई जखमी झाली. तर दुचाकीवरील दोघं जण देखील खाली पडले.
अपघात झाल्याचे लक्षात येताच घटनास्थळी नागरिकांनी गर्दी केली. नागरिकांच्या चोप देण्याच्या भीतीने आम्ही मुलीला रुग्णालयात नेत उपचार करतो, असे दुचाकीवरील दोघांनी सांगितले. त्यानुसार दोघांनी अन्वीला घेऊन जवळच्या दवाखान्यात नेले. परंतू तेथील डॉक्टरांनी अन्वीची प्रकृती गंभीर असून तिला तात्काळ घाटी रुगणालयात दाखल करण्याचा सल्ला दिला. त्यानुसार दुचाकीवरील दोघांनी अन्वीला लागलीच घाटी रुग्णालयात नेले. परंतू तोपर्यंत खूप उशीर झालेला होता. डॉक्टरांनी अन्वीला तपासातच मृत घोषित केले. आता आपलं काही खरं नाही, या भीतीने दुचाकी स्वारांनी रुग्णालयातून पळ काढला.
दुसरीकडे जखमी शीला यांनी पती प्रताप मोरे यांना अपघाताची माहिती दिली. त्यानुसार ते लागलीच घटनास्थळीच दाखल झाले. परंतू दुचाकीस्वार दोघं जण आपल्या मुलीला नेमकं कोणत्या रुग्णालयात घेऊन गेलेत, हे त्यांना माहित नव्हते. जवळच्या एका रुग्णालयात चौकशी केली असता दोघांनी तिला घाटीत नेल्याचे सांगण्यात आले. भेदरलेल्या आईवडिलांनी घाटी रुग्णालयात धाव घेतली. पण घाटीत पोहोचताच अपघात विभागातील अन्वीचा मृतदेह बघताच दोघांनी एकच हंबरडा फोडला. या घटनेनंतर प्रताप मोरे यांनी सिडको पोलिस ठाण्यात दुचाकीस्वाराविरोधात तक्रार नोंदविली. त्यानुसार दुचाकीचालक ललित सातोदकर (रा. येवला, जि. नाशिक) याच्या विरोधात सिडको पोलिस ठाण्यात गुन्हा दाखल करण्यात आला.
