रायगड (वृत्तसंस्था) डेकोरेशन साहित्याची वाहतूक करणाऱ्या गाडीला भीषण अपघात (Accident) झाला. यावेळी गाडीच्या टपावरुन प्रवास करणारे तब्बल २२ जण भर रस्त्यात कोसळले. या दुर्घटनेत एकाचा मृत्यू झाला आहे. अन्य चार ते पाच जण गंभीर जखमी झाले असून त्यांची प्रकृती चिंताजनक असल्याची माहिती आहे.
पहाटे तीन वाजताच्या सुमारास मुंबई पुणे महामार्गावरील मॅजिक पॉईंट जवळ (अंडा पॉईंट) बोरघाट येथे अपघात झाला. सहारा सिटी येथून मंडप काम करुन मुंबईकडे परतणाऱ्या डेकोरेशन साहित्याच्या गाडीला अपघात झाला. यामध्ये गाडीतील टपावर बसलेले २२ जण खाली कोसळले. त्यातील एकाला प्राण गमवावे लागले आहेत. तर चार ते पाच जण गंभीर जखमी झाले आहेत. जखमींना खोपोली नगरपालिका रुग्णालयात उपचारासाठी नेण्यात आले आहे. आयआरबी पेट्रोलिंग, देवदूत यंत्रणा, डेल्टा फोर्स, लोकमान्य आरोग्य यंत्रणा, खोपोली पोलीस स्टेशनचे कर्मचारी यांनी यावेळी मदतकार्य करत जखमींना हॉस्पिटलमध्ये दाखल केले आहे.
