परभणी (वृत्तसंस्था) तक्रारदाराविरुद्ध दाखल असणाऱ्या गुन्ह्यात मदत करण्यासाठी पाथरी ठाण्यातील महिला पोलीस कर्मचाऱ्याला पाच हजार रुपयांची लाच स्वीकारतांना परभणी लाचलुचपत प्रतिबंधक विभागाने ताब्यात घेतले. संगीता नामदेवराव वाघमारे (नेमणूक, पाथरी पोलीस ठाणे) असे संशयित महिला पोलिस हवालदाराचे नाव आहे.
या संदर्भात अधिक असे की, तक्रारदार यांच्या घरासमोरील जायकवाडीच्या जागेत अतिक्रमण करून तेथे राहणारे, अवैध व्यवसाय करणाऱ्यांचा त्रास तक्रारदारांना होत होता. त्यामुळे तक्रारदार उपोषणास बसले होते. प्रकल्पाच्या जागेत अतिक्रमण करून राहणाऱ्या व्यक्तीने तक्रारदार यांच्याविरुद्ध गुन्हा दाखल केला. याच प्रकरणात त्यांना मदतीसाठी महिला पोलीस कर्मचारी संगीता वाघमारे हिने लाचेची मागणी केली होती.
मंगळवारी २० जूनला तक्रारदार यांनी दिलेल्या एसीबीकडे केलेल्या तक्रारीवरून पडताळणीदरम्यान त्यांनी तक्रारदाराकडे पंचासमक्ष पाच हजाराची लाच मागितली. त्यावरून रचलेल्या सापळ्यात संगीता वाघमारे यांनी तक्रारदार यांच्याकडून पाच हजार रुपयांची लाचेची रक्कम पाथरीतील ओंकारनगरात स्वीकारली. यानंतर एसीबीच्या पथकाने त्यांना लाचेच्या रकमेसह ताब्यात घेतले. ही कारवाई परभणी एसीबीचे पोलिस उपअधीक्षक अशोक इप्पर, सदानंद वाघमारे, कर्मचारी चंद्रशेखर निलपत्रेवार, सीमा चाटे, कल्याण नागरगोजे, कदम यांनी केली.
