भडगाव (प्रतिनिधी) तालुक्यातील कजगाव येथील सोनार गल्लीत शनिवारी दुपारी दोन दरोडेखोरांचा एका दुकानातून सोन्या-चांदीचा ऐवज लुटण्याचा प्रयत्न केल्याची घटना घडल्यानंतर प्रचंड खळबळ उडाली आहे. दुकानदाराने आरडाओरड करताच बाजूच्या नागरिकांनी घटनास्थळी धाव घेत दरोडेखोरांना पकडण्याचा प्रयत्न केला. पण, दोन दरोडेखोरांनी ४ पिस्तुलच्या सहाय्याने सर्वांना वेठीस ठेवत पोबारा केला.
मुख्य कजगाय बाजारपेठेतील सोनार गल्लीत बालाजी ज्वेलर्स या दुकानावर शनिवारी दुपारी ४ वाजता अज्ञात दोन व्यक्ती सोन्याच्या वस्तू तयार करण्याच्या बहाण्याने आत आले. या वेळी बालाजी ज्वेलर्सचे संचालक उमेश विनोद बोरा हे एकटेच दुकान होते. दुकानात उमेश बोरा हे एकटेच असल्याचे पाहुन त्या दोघा दरोडेखोरांनी आपल्या जवळील पिस्तुल बाहेर काढून बोरा फसला.
दुकानातील ऐवज हिसकावण्याचा प्रयत्न केला. परंतु घटनेचे गांभीर्य ओळखून दुकानदार बोरा यांनी लागलीच आरडाओरड केली. बोरा यांची आरडाओरड पाहून परिसरातील नागरिक घटनास्थळी धावले. परंतु दोन्ही दरोडेखोरांनी चार पिस्तुल हातात घेवून नागरिकांना वेठीस धरले. त्यानंतर या दोघांनी पिस्तुलचा धाक दाखवून कारमध्ये बसल्यानंतर पोबारा केला. याच वेळी पोलिस ही घटनास्थळी दाखल झाले. त्यांनी ही त्या दरोडेखोरांचा पाठलाग करून त्यांना पकडण्याचा प्रयत्न केला. परंतु हे दरोडेखोर नागद रस्त्याने पसार झाले. ही माहिती पोलिस नाईक नरेंद्र विसपुते यांनी नगरदेवळा पोलिसांना कळवली. तसेच त्यांनी स्वतः दरोडेखोरांचा पाठलाग सुरूच ठेवला. परंतु, सोयगाव तालुक्यातील निमखेडी शिवारात दरोडेखोरांनी कार सोडून पोबारा केला. ही कार चोरीची होती. तर दरोडेखोर हे २५ ते ३० वयोगटातील होते.
यांनी केला पाठलाग
दरोडेखोरांना पकडण्यासाठी पोलिसांना कजगावसह नेरी व परिसरातील ग्रामस्थांनी सहकार्य केले. या घटनेची माहिती मिळताच पोलिस उपअधीक्षक चोपडे, भडगाव पोलिस ठाण्याचे पोलिस निरीक्षक राजेंद्र पाटील, हवालदार विलास पाटील, सचिन वाबळे, पोलिस नाईक नरेंद्र विसपुते, स्थानिक गुन्हे शाखेचे पोलिस निरीक्षक किसनराव नजन पाटील, पोलिस उपनिरीक्षक चौबे, लक्ष्मण पाटील, नगरदेवळा येथील सहाय्यक फौजदार कैलास पाटील, हवालदार विनोद पाटील, नरेंद्र शिंदे, स्वप्नील पाटील, होमगार्ड आणि कजगावच्या पोलिस पाटलांनी परिसर पिंजून काढला. परंतु, तो- पर्यंत दरोडेखोर पसार झाले होते.
