अहमदनगर (वृत्तसंस्था) राज्यात ग्रामपंचायत निवडणुकांची रणधुमाळी चालू आहे. काही ग्रामपंचायतीत सरपंचपदाचा लिलाव करत कोट्यवधींची बोली लावण्यात आली. हा सरपंचपदाचा लिलाव नसून लोकशाहीचा लिलाव असल्याची टीका ज्येष्ठ समाजसेवक अण्णा हजारे यांनी केली
पत्रकात अण्णा हजारे म्हणाले, पंचायत राज मजबूत व्हावे, यासाठी ग्रामसभा व ग्रामपंचायतीचे स्थान सर्वोच्च आहे. ग्रामसभा ही गावची संसद असून ग्रामपंचायत सदस्य हे कार्यकारी मंडळ आहे. सरपंचपदाचा लिलाव झाला, तर लोकसभा व विधानसभा कमजोर होण्याची शक्यता नाकारता येत नाही. लिलाव पद्धतीने निवड झाल्यामुळे काही गुंड, भ्रष्टाचारी, व्यभिचारी लोक त्या पवित्र मंदिरामध्ये जातील. ‘देशात लोकशाही यावी, या साठी ९० वर्षात लाखो लोकांनी जेलमध्ये जाऊन, भूमीगत राहून इंग्रजांच्या गोळ्या, लाठ्या-काठ्या खाऊन अनंत हाल अपेष्टा सहन केल्या. जुलमी, अन्यायी इंग्रजांना देशातून घालवायचे आणि आमच्या देशात लोकांची, लोकांनी, लोक सहभागातून चालविलेली लोकशाही आणायची, असे त्यांचे स्वप्न होते. पण सरपंच पदाचा लिलाव म्हणजे त्या लोकशाहीचाच लिलाव आहे, देशात लोकशाही यावी, यासाठी अनेकांनी प्राणांचे बलिदान केले. त्यांचे बलिदान व्यर्थ गेले की काय, तसंच ७० वर्षात लोकांना लोकशाहीचा अर्थ समजला नाही का? असेही त्यांनी म्हटले आहे.
‘पंचायत राज मजबूत व्हावे, ग्रामसभा आणि ग्रामपंचायत यांचे स्थान सर्वोच्च स्थान आहे. ग्रामसभा ही गावची संसद आहे. या घटकांनी एक दुसऱ्यांच्या विचाराने दिल्लीची संसद लोकसभा आणि राज्याची संसद विधानसभा मजबूत करावयाची आहे. कारण, आमदार आणि खासदारांना ग्रामसभा निवडून पाठविते. त्यासाठी सामाजिक आणि राष्ट्रीय दृष्टीकोन असणारे चारित्र्यशील उमेदवार लोकसभा आणि विधानसभेसाठी निवडून पाठवायचे आहेत’असंही अण्णा म्हणाले.
हजारे म्हणाले, गावातील सर्व मतदारांच्या संमतीने ग्रामसभेत सदस्यांची निवड करून निवडणूक बिनविरोध करणे हा उत्तम पर्याय आहे. त्यामुळे गावात मतभेद होत नाही. खेळीमेळीच्या वातावरणात निवडणुका पार पडतात.
