अहेरी (वृत्तसंस्था) पोलीस अधिकाऱ्याने वर्दी घातली म्हणजे त्याच्यातली माणुसकी मरते, असा सर्वांचा समज असतो. विशेषतः नक्षलग्रस्त भागात तर याची प्रचीती मोठ्या प्रमाणात येत असते. परंतू काही अधिकारी कर्तव्याबरोबर माणुसकी देखील जपावी लागते, याचाही संदेश देतात. असाच माणुसकी आणि प्रेमाचा संदेश पेरमिली उप-पोलीस स्थानकाचे पोलीस उपनिरीक्षक पंकज सपकाळे यांनी नक्षल पिडीत परिवारास आपल्या मुलीचा वाढदिवस साजरा न करता १० हजाराची आर्थिक मदत करून दिला आहे.
पोलीस अधिकाऱ्याच्या मुलीचा वाढदिवस म्हटला म्हणजे…मोठा तामझाम…जेवण,पार्टी वैगैरे हे अपेक्षित असते. परंतू या पारंपारिक गोष्टींना फाटा देत पीएसआय पंकज सपकाळे यांनी एक नवीन आदर्श निर्माण केला आहे. पोलिसांना मदत केल्याच्या संशयातून येरमनार गावचे रमेश रामटेके यांची नक्षलवाद्यांनी हत्या केली होती. घरात अठरा विश्वे दारिद्र्य असणाऱ्या रामटेके परिवारावर हा मोठा आघात होता. रामटेके परिवाराची आर्थिक स्थिती बेताची असल्यामुळे पीएसआय सपकाळे हे अनेक दिवसापासून या परिवाराला मदत करण्याची इच्छा ठेवून होते. अखेर आपली मुलगी कुमारी प्रज्ञा हिच्या वाढदिवसानिमित्त रामटेके परीवातील श्रीमती शकुंतला रमेश रामटेके यांना त्यांच्या मुलीसह पोलीस स्थानकात सन्मानाने बोलावून पीएसआय श्री.सपकाळे यांनी १० हजाराचा धनादेश सुपूर्द केला.
याआधी देखील पीएसआय श्री. सपकाळे यांनी दिवाळीच्या वेळी रामटेके परिवाराच्या घरी जाऊन मिठाई दिली होती. एका पोलीस अधिकाऱ्याने अत्यंत साधेपणाने आपल्या मुलीचा नक्षल पीडित कुटुंबियांसोबत साजरा केलेला वाढदिवस अनेक दिवस स्मरणात राहील असाच झाला. यावेळी पेरमिली पोलीस स्थानकाचे प्रभारी अधिकारी पीएसआय मतकर, पीएसआय पाटील, पोलीस पाटील मडावी, उपसरपंच तलाठी व ऐरमनारचे ग्रामस्थ उपस्थित होते. पीएसआय पंकज सपकाळे यांनी केलेल्या या उपक्रमाचे अप्पर पोलीस अधीक्षक सोमय मुंढे, अहेरी उपविभागीय अधिकारी बजरंग देसाई यांनी कौतुक केले आहे.
