जळगाव (प्रतिनिधी) बांभोरी येथील जैन इरिगेशन कंपनीमध्ये कामाला असलेल्या पत्नीला सोडण्यासाठी जात असलेल्या पतीच्या दुचाकीला भरधाव ट्रकने दिलेल्या धडकेत पतीचा मृत्यू तर पत्नी गंभीर जखमी झाल्याची दुर्दैवी घटना शनिवारी दुपारी घडली. हेमंत काशिनाथ चौधरी (५०) असे मृत पतीचे तर माधवी चौधरी (४५, दोघेही रा. खोटेनगर) असे जखमी पत्नीचे नाव आहे,
हेमंत काशिनाथ चौधरी हे परिवारासह खोटे नगर परिसरात वास्तव्यास होते. ते जळगाव शहरातील पोलनपेठ परिसरात मेडीकल डिस्ट्रीब्यूटर म्हणून नोकरीला होते. तर हेमंत यांची पत्नी माधवी या बांभोरी गावाजवळील जैन कंपनीत नोकरीला आहेत. शनिवारी दुपारी १२.३० वाजेच्या सुमारास ते पत्नीला कामावर सोडण्यासाठी जैन कंपनी जवळून जाताना महामार्गावर धरणगाव तालुक्यातील बांभोरी गावाजवळ एका भरधाव वेगाने येणाऱ्या ट्रकने त्यांच्या दुचाकीला पाठीमागून जोरदार धडक दिली.
या धडकेत चौधरी दांपत्य हे दुचाकीसह महामार्गाच्या खाली फेकले गेले. त्यात दोघांच्या डोक्याला गंभीर दुखापत झाली. स्थानिक ग्रामस्थ व तरुणांच्या मदतीने जखमींना तातडीने जिल्हा शासकीय वैद्यकीय महाविद्यालयात उपरार्थ दाखल करण्यात आले होते. उपचारादरम्यान हेमंत चौधरी यांचा मृत्यू झाला. दरम्यान, या घटनेमुळे हेमंत यांची पत्नी माधवी यांच्यासह परिवारातील सदस्यांना मोठा मानसिक धक्का बसला आहे.
