हैदराबाद (वृत्तसंस्था) २०१९ साली हैदराबाद येथे घडलेल्या घटनेने संपूर्ण देश हादरला होता. या घटनेत एका मुलीवर चार व्यक्तींनी सामुहिक बलात्कार करून तिला जिवंत जाळलं होतं. या घटनेनंतर सोशल मीडियावर पीडितेला न्याय देण्याची मागणी केली जात होती. यातच काही बॉलिवूड कलाकारांनी पोस्टमध्ये पीडित मुलीच्या नावाचा खुलासा करत तिची ओळख सार्वजनिक केली होती. यामुळे आता अक्षय- सलमानसह ३८ कलाकारांविरुद्ध गुन्हा दाखल करण्यात आलाय.
बॉलिवूड कलाकरां व्यतिरिक्त या सेलिब्रिटींमध्ये साऊथ फिल्म इंडस्ट्रीतील काही कलाकारांचा देखील समावेश आहे. कायद्यानुसार कोणत्याही बलात्कार पीडितेचं नाव, छायाचित्र किंवा खरी ओळख कुठेही उघड करणं हा गुन्हा आहे. दिल्लीतील वकील गौरव गुलाटी यांनी बॉलिवूड सेलिब्रिटींविरोधात हा गुन्हा दाखल केला आहे. त्यांनी दिल्लीतील सबजी मंडी पोलीस ठाण्यात फिर्याद दाखल केली आहे. पोलिसांनी याप्रकरणी भारतीय दंड संहितेच्या कलम 228A अंतर्गत गुन्हा नोंदवला आहे.
तसेच याप्रकरणी तीस हजारी न्यायालयात याचिका दाखल करण्यात आली आहे. आपल्या याचिकेत तक्रारदार वकिलानं म्हटलं की, सामान्यांसाठी उदाहरण बनण्याऐवजी भारतीय सेलिब्रिटी नियम मोडत आहेत. त्यांनी पीडितेची ओळख उघड केली आहे. संबंधित सर्व सेलिब्रिटींना तातडीनं अटक करण्यात यावं, अशी मागणी याचिकाकर्त्या वकीलानं केली आहे. त्यामुळे अक्षय कुमार, सलमान खान, अजय देवगण सहित ३८ कलाकारांवर अटकेती टांगती तलवार आहे.
