पारोळा (प्रतिनिधी) माझे लग्न आहे, मला तुमच्या बोटातील अंगठी सारखी अंगठी बनवायची असं सांगून २१ हजारांची सोन्याची अंगठी घेऊन एकाला गंडवल्याप्रकरणी पारोळा पोलीस ठाण्यात अज्ञात इसमाविरुद्ध गुन्हा दाखल करण्यात आला आहे.
यासंदर्भात वीरभान भिकन पाटील (वय ४७ रा. जोगलखेडा ता. पारोळा) यांनी दिलेल्या फिर्यादीनुसार, दि. १० एप्रिल २०२२ दुपारी १२.३० वाजेच्या सुमारास ते नगर पालिका चौकात भाजीपाला घेत होते. त्याचवेळी तिथं एक अनोळखी इसम जवळ आला आणि म्हणाला की, मी तुम्हाला चांगले ओळखतो. माझे लग्न आहे, मला तुमच्या बोटातील अंगठी सारखी अंगठी बनवायची आहे. ती तुम्ही मला काढुन दाखवा. त्यानंतर वीरभान यांनी त्या अनोळखी व्यक्तीला २१ हजारांची सोन्याची अंगठी काढुन दाखवली. त्यावर तो अनोळखी व्यक्ती त्यांना म्हणाला की, मी सोनाराला दाखवुन येतो. बराच वेळ वीरभान यांनी अनोळखी वाट बघितली. परंतू तो परत आला नाही. शेवटी आपली फसवणूक झाल्याचे लक्षात येताच वीरभान पाटील यांनी पारोळा पोलीस ठाण्यात अज्ञात इसमाविरुद्ध गुन्हा दाखल केला. याप्रकरणी पुढील तपास पो.ना. योगेश जाधव हे करीत आहेत.
